08.04.2026

Buxoro davlat universitetida O‘zmilliybank AJ “Kelajakka qadam” markazi rahbariyati hamda bitiruvchi talabalar bilan uchrashuv bo‘lib o‘tdi.

Tadbirni Oliy ta’lim, fan va innovatsiyalar vaziri o‘rinbosari O‘ktam Salomov ochib berdi. U o‘z so‘zida O‘zbekiston Respublikasi Prezidentining PQ-61-son hamda PQ-328-son qarorlari mazmun-mohiyatiga to‘xtalib, bitiruvchi yoshlarni ish bilan ta’minlash, ularning bandligini oshirish va kasbiy faoliyatga yo‘naltirish borasida amalga oshirilayotgan chora-tadbirlar haqida ma’lumot berdi.

Uchrashuvda Buxoro davlat universiteti rektori Obidjon Xamidov bitiruvchilarni ish bilan ta’minlash ustuvor vazifalardan biri ekanini, bu borada universitetda tizimli ishlar olib borilayotganini alohida ta’kidladi. Shuningdek, mazkur uchrashuvda Buxorodagi davlat va nodavlat oliy ta’lim muassasalari vakillari ham studiya orqali ishtirok etayotgani qayd etildi.

Tadbir davomida O‘zmilliybank AJ “Kelajakka qadam” markazi mutaxassisi Shohzamon Jamshidovich tomonidan loyiha imkoniyatlari, bitiruvchilar uchun yaratilayotgan sharoitlar hamda mavjud yo‘nalishlar haqida batafsil ma’lumot berildi.

Shuningdek, uchrashuv davomida O‘zmilliybank AJ “Kelajakka qadam” markazi tomonidan bitiruvchi talabalarga ajratilgan kredit voucherlari topshirildi.

Tadbirda “O‘zmilliybank” AJ Buxoro viloyat bosh boshqarmasi boshqaruvchisi Obid Shodiyev ham so‘zga chiqib, mazkur dastur mazmun-mohiyati, uning imkoniyatlari hamda bitiruvchi yoshlarni qo‘llab-quvvatlash borasidagi ahamiyati haqida batafsil ma’lumot berdi.

Mazkur uchrashuv bitiruvchi talabalarni mehnat bozoriga samarali yo‘naltirish, ularning bandligini ta’minlash, tadbirkorlik tashabbuslarini qo‘llab-quvvatlash va kelgusidagi kasbiy faoliyatiga amaliy ko‘mak berishda muhim ahamiyat kasb etdi.