22.10.2026

2026-yil 22-oktabr kuni Buxoro davlat universitetining kichik majlislar zalida “Gender tenglik – teng huquq va imkoniyatlar kafolati” mavzusida davra suhbati tashkil etildi.

Mazkur tadbirning asosiy maqsadi jamiyatda xotin-qizlar va erkaklarning teng huquq hamda imkoniyatlarini ta'minlash, gender tenglik tamoyillarining mazmun-mohiyatini keng targ'ib qilish, talaba-yoshlarning huquqiy ongi va madaniyatini yuksaltirishdan iborat bo'ldi.

Davra suhbati davomida gender tenglik tushunchasi, uning jamiyat taraqqiyotidagi o'rni, mamlakatimizda xotin-qizlarning huquq va qonuniy manfaatlarini himoya qilish borasida amalga oshirilayotgan islohotlar yuzasidan ma'lumotlar berildi.

Tadbirda taqdimot materiallari asosida gender tenglikning asosiy yo'nalishlari, xususan, ta'lim olish, mehnat qilish, oilaviy munosabatlarda teng huquqlilik hamda rahbarlik va boshqaruv jarayonlarida teng imkoniyatlardan foydalanish masalalari batafsil yoritildi. Tadbirda f.f.d. (DSc), dotsent N.N.Hamroyeva ma'ruza qildi. Ma'ruzada gender tenglik nafaqat xotin-qizlarning huquqlarini himoya qilish, balki jamiyatning barcha a'zolari uchun adolatli sharoit yaratish, inson salohiyatidan samarali foydalanish hamda barqaror ijtimoiy taraqqiyotga erishishning muhim omili ekanligi ta'kidladi.

Davra suhbati davomida oilada o'zaro hurmat va mas'uliyatni shakllantirish, ta'lim muassasalarida teng imkoniyatlarni ta'minlash, kasb tanlashda gender stereotiplarini bartaraf etish hamda yoshlarning jamiyat hayotidagi faolligini oshirish masalalari yuzasidan fikr-mulohazalar bildirildi.

Tadbir ishtirokchilariga gender tenglik tamoyillariga rioya etish, o'z huquq va majburiyatlarini bilish, jamiyatda o'zaro hurmat, hamjihatlik va bag'rikenglik muhitini mustahkamlash muhimligi tushuntirildi.