10.09.2026

10-sentabr kuni Buxoro davlat universiteti Iqtisodiyot va turizm fakultetining “Yashil iqtisodiyot va agrobiznes” kafedrasida professor-o‘qituvchilar hamda talabalar ishtirokida kiberxavfsizlik yo‘nalishida profilaktik targ‘ibot tadbiri o‘tkazildi. Tadbir Raqamli ta’lim texnologiyalarini joriy etish va axborot xavfsizligini ta’minlash sektori muhandis-dasturchisi R.N. Salimov tomonidan tashkil etilib, unda kiberjinoyatchilik, internet firibgarligi, talonchilik va boshqa turdagi huquqbuzarliklarning oldini olish, shuningdek, kibermakonda xavfsiz faoliyat yuritish masalalariga alohida e’tibor qaratildi.

Tadbir davomida ishtirokchilarga so‘nggi vaqtlarda keng tarqalayotgan “dropperlik” amaliyotlari va ularning xavfli oqibatlari haqida batafsil ma’lumot berildi. Xususan, noma’lum manbalardan kelgan APK fayllarni o‘rnatmaslik, shubhali havolalarga kirmaslik, turli “oson daromad”, sovrin yoki xizmat takliflariga aldanmaslik, SMS orqali yuborilgan tasdiqlash kodlari va shaxsiy ma’lumotlarni begona shaxslarga bermaslik bo‘yicha tavsiyalar berildi. Ishtirokchilarni kiberxavfsizlik qoidalariga qat’iy rioya qilishga, raqamli muhitda hushyor va mas’uliyatli bo‘lishga chaqirildi.