30.10.2026

Buxoro davlat universiteti Talabalar turar joyida Korrupsiyaga qarshi kurashish “Komplaens-nazorat” tizimini boshqarish bo‘limi tomonidan talaba-yoshlar bilan ochiq muloqot tashkil etildi.

Muloqot davomida talabalarga “Akademik halollik” tartib-qoidalari, oraliq va yakuniy nazoratlarga tayyorgarlik ko‘rish, nazoratlar oldidan kutubxonalarga tashrif buyurish, fanlarga oid kitoblarni mutolaa qilish, bilim va o‘zlashtirish darajasini oshirish, mustaqil ta’lim ko‘nikmalarini shakllantirib borish bo‘yicha tavsiyalar berildi.

Shuningdek, sun’iy intellektdan bilimlarni chuqurlashtirish va o‘quv jarayonini samarali tashkil etish maqsadida foydalanish, biroq tayyor topshiriqlarni sun’iy intellekt vositalari orqali bajarib, faqat baho olishga odatlanmaslik zarurligi ta’kidlandi. Mustaqil ishlarni bajarishda ilmiy mulohazalar, turli fanlarga oid adabiyotlar va ilmiy ishlardan foydalanish hamda nazariy va ilmiy xulosalarga asoslanish bo‘yicha ko‘rsatmalar berildi.

Shu bilan birga, talabalarga korrupsiyaning har qanday ko‘rinishiga nisbatan murosasiz munosabatda bo‘lish, universitetning Odob-axloq kodeksi hamda ichki tartib-qoidalariga rioya qilishning ahamiyati tushuntirildi.

Shuningdek, maishiy korrupsiya nafaqat ta’lim jarayonida, balki kundalik hayotning turli jabhalarida ham uchrashi mumkinligi qayd etildi. Korrupsion holatlarga duch kelganda anonim murojaat yo‘llash imkoniyatlari haqida ma’lumot berildi.