30.10.2026

Joriy yilning 4-sentyabr kuni Buxoro davlat universitetida 2026–2027-o‘quv yilida ishga qabul qilinishga nomzod pedagog xodimlar uchun “Korrupsiyasiz oliy ta’lim” mavzusida seminar mashg‘uloti tashkil etildi.

Seminar davomida universitetning Korrupsiyaga qarshi kurashish “Komplaens-nazorat” tizimini boshqarish bo‘limi mutaxassislari tomonidan komplaens-nazorat tizimining maqsadi, asosiy vazifalari va funksiyalari haqida batafsil tushuntirishlar berildi. Shuningdek, ishtirokchilarning mavzu yuzasidan qiziqtirgan savollariga javob qaytarildi.

Tadbirda nomzod pedagog xodimlarga mehnat faoliyatining dastlabki kunlaridanoq o‘z ustida muntazam ishlash, yangilik va innovatsiyalarga intilish, ilmiy salohiyatini izchil oshirib borish, shuningdek, nufuzli xalqaro ilmiy jurnallarda maqolalar chop etish orqali ilmiy faoliyatini rivojlantirish zarurligi ta’kidlandi.
Shu bilan birga, Buxoro davlat universitetida amalga oshirilayotgan korrupsiyaga qarshi siyosat, korrupsiyaviy xavf-xatarlarni aniqlash, baholash va ularning oldini olishga qaratilgan chora-tadbirlar haqida batafsil ma’lumot berildi.

Seminar yakunida universitetning Odob-axloq kodeksi, Ichki tartib-qoidalari hamda Akademik halollik kodeksining mazmun-mohiyati tushuntirildi. Xodimlarga xizmat faoliyati davomida nepotizm, kronizm, manfaatlar to‘qnashuvi va boshqa korrupsiyaviy holatlarga yo‘l qo‘ymaslik, faoliyatda halollik, xolislik va mas’uliyat tamoyillariga qat’iy rioya etish zarurligi alohida uqtirildi.