21.05.2026

BuxDUda “Chorshanba – sport kuni” doirasida professor-o‘qituvchilar o‘rtasida Sport musobaqalari o‘tkazilmoqda

Bugun, 20-may kuni Buxoro davlat universitetida “Chorshanba – sport kuni” munosabati bilan professor-o‘qituvchilar hamda ishchi-xodimlar o‘rtasida an’anaviy sport musobaqalari bo‘lib o‘tdi.
Mazkur sport bayrami O‘zbekiston Respublikasi Prezidentining 2020-yil 30-oktyabrdagi “Sog‘lom turmush tarzini keng tatbiq etish va ommaviy sportni yanada rivojlantirish chora-tadbirlari to‘g‘risida”gi PF-6099-sonli Farmoni hamda jismoniy tarbiya va sport sohasidagi videoselektor yig‘ilishida belgilangan topshiriqlar ijrosini ta’minlash maqsadida tashkil etildi. Erta tongdan universitet sport maydonlarida umumiy yurish marafoni va badantarbiya mashqlari bilan boshlangan tadbirda BuxDU jamoasi ommaviy ravishda ishtirok etdi.

Sport bayrami doirasida ishtirokchilar futbol, basketbol, voleybol, stol tennisi hamda shaxmat-shashka kabi sport turlari bo‘yicha o‘zaro bahslashdilar. Murosasiz va do‘stona ruhda o‘tgan o‘yinlar professor-o‘qituvchilarning nafaqat ilmiy faoliyatda, balki sportda ham mahoratli ekanliklarini ko‘rsatdi. BuxDU jamoasi o‘rtasidagi ushbu an’anaviy musobaqalar ish samaradorligini oshirish va sog‘liqni tiklashda muhim ahamiyat kasb etmoqda.