24.10.2026

Ona sizni koʻrgim kelyapti

Ona sizni koʻrgim kelyapti,
Sahar turib, yolgʻiz Ollohdan
Visolingiz koʻrish tilayman.
Tushlarimga kirib boʻlsa ham
Vaslingizga toʻyayin deyman

Ona sizni koʻrgim kelyapti,
Yolgʻiz Alloh bilar dardimni.
Oʻngim-u, tushimda, xayolda ham siz
Hech boʻlmaganda, umrimda bir bor
Visolingiz koʻrmoq istayman.

Ona sizni koʻrgim kelyapti,
Hatto ismingizni bilmayman, ey voh,
"Ona" deya qolgansiz yodda
Hatto borligingiz bilmayman oʻzim
Sizni bir bor koʻrmagan koʻzim

Ona sizni koʻrgim kelyapti,
Duolar-u, soʻzlarimda siz
Jamolingiz soʻrab Ollohdan
Tushlarimda kutarman sizning,
"Qizim"-deya kelishingizni.

Kirsangiz gar tushimga bir bor,
Rozi edim hech uygʻonmaslikka,
Sizni bir bor koʻrish uchun ham,
Kechar edim foniy dunyodan.

Ona sizni koʻrgim kelyapti,
Sizni koʻrib, oʻzimga bir bor
Nazar solib qoʻygim kelyapti
Koʻzlaringiz, yuzlaringizni
Solishtirib koʻrgim kelyapti.

Yonimda kim boʻlsa-da, shu on
"Mana mening onam"- deya,
Tanishtirib qoʻygim kelyapti,
Ona sizni koʻrgim kelyapti.

Ona sizni koʻrgim kelyapti,
Soyangizni koʻrib boʻlsa-da,
Ruhingizni suyib boʻlsa-da,
Rasmingizni chizib boʻlsa-da,
Sizni juda koʻrgim kelyapti.

Ona sizni koʻrgim kelyapti,
Tushlarimga kirganingizda
Hech siz bilan ajralmasdan men
To tonggacha toʻyib qarasam,
Soʻzlaringiz tinglasam deyman.

Ona sizni koʻrgim kelyapti,
Hech qoʻyvormay, toʻyib quchoqlab,
Hidlaringiz ololsam deyman
Ne boʻlsa ham soʻnggi istagim,
Yuzlaringiz koʻrolsam deyman...

                                                                                                                                                                                 Nabiyeva Sevinch