08.04.2026

O‘zbekiston Respublikasi Oliy ta’lim, fan va innovatsiyalar vaziri o‘rinbosari O‘ktam Salomov Buxoro davlat universitetiga tashrif buyurib, oliygohda robototexnika va innovatsion faoliyat yo‘nalishida amalga oshirilayotgan ishlar bilan yaqindan tanishdi.

Tashrif davomida vazir o‘rinbosari universitet rektori, professor Obidjon Xamidov hamrohligida BuxDU huzurida faoliyat yuritayotgan zamonaviy “RobotsAndMe” robototexnika o‘quv markazi faoliyatini ko‘zdan kechirdi. Mazkur markaz bugungi kunda nafaqat hududda, balki respublika miqyosida ilg‘or innovatsion maydon sifatida shakllanib borayotgani alohida ta’kidlandi.

Markazda yaratilgan zamonaviy laboratoriya jihozlari, amaliy tajriba maydonlari hamda talabalar tomonidan ishlab chiqilgan innovatsion robot qurilmalari mehmonlarda katta taassurot qoldirdi. Eng muhimi, bu yerda faoliyat yuritayotgan iqtidorli talabalar va mutaxassislar xalqaro va jahon miqyosidagi robototexnika tanlovlari hamda musobaqalar sovrindorlari ekani e’tirof etildi.

O‘ktam Salomov yoshlarning muhandislik tafakkuri, kreativ yondashuvi va texnologik salohiyatini yuqori baholab, BuxDUda robototexnika yo‘nalishida yaratilgan muhitni namunali tajriba sifatida qayd etdi. Shuningdek, markaz faoliyatini yanada rivojlantirish, startap loyihalarni qo‘llab-quvvatlash hamda ishlanmalarni tijoratlashtirish bo‘yicha muhim tavsiyalarini bildirdi.

Ta’kidlash joizki, Buxoro davlat universitetida robototexnika sohasida olib borilayotgan izchil ishlar nafaqat yoshlarning ilmiy-texnik salohiyatini oshirishga, balki ularni global innovatsion maydonda raqobatbardosh mutaxassislar etib tayyorlashga xizmat qilmoqda.