20.03.2026

Buxoro davlat universiteti rektori, professor Obidjon Xamidovning Xitoy Xalq Respublikasiga amalga oshirgan xizmat safari doirasida Nankin audit universiteti bilan muhim uchrashuv tashkil etildi.

Mazkur uchrashuv davomida tomonlar o‘rtasida ta’lim va ilmiy-tadqiqot sohalarida hamkorlikni yanada kengaytirishga qaratilgan muzokaralar olib borildi. Xususan, davlat auditi yo‘nalishida o‘zaro hamkorlikni rivojlantirishga xizmat qiluvchi “yo‘l xaritasi” (roadmap) imzolandi. Ushbu hujjat doirasida qo‘shma seminar va treninglar tashkil etish, professor-o‘qituvchilar hamda mutaxassislar ishtirokida ilmiy izlanishlarni chuqurlashtirish, ilg‘or tajribalarni almashish ko‘zda tutilgan.

Shuningdek, tashrif jarayonida universitet faoliyati, ta’lim tizimi hamda ilmiy-tadqiqot ishlari bilan yaqindan tanishildi. Uchrashuvlar davomida davlat auditi va moliyaviy nazorat sohalarida qo‘shma ta’lim dasturlarini yo‘lga qo‘yish, akademik almashinuvni rivojlantirish hamda xalqaro ilmiy loyihalarni amalga oshirish masalalari atroflicha muhokama qilindi.

Qayd etish joizki, mazkur hamkorlik tashabbuslari davlat auditi sohasida yuqori malakali kadrlar tayyorlash tizimini takomillashtirishga qaratilgan bo‘lib, ular O‘zbekiston Respublikasi Prezidentining tegishli farmonlari bilan belgilangan ustuvor vazifalar va tizimli islohotlar bilan uzviy uyg‘unlikda amalga oshirilmoqda.

Mazkur tashrif Buxoro davlat universitetining xalqaro hamkorlik aloqalarini yanada mustahkamlash, ta’lim sifatini oshirish hamda zamonaviy va raqobatbardosh mutaxassislar tayyorlash imkoniyatlarini kengaytirishga xizmat qiladi.