Assalomu alaykum, hurmatli talaba-qizlarimiz, muhtarama ayollar!
Qadrli opa-singillar!
Yurtimizga bahor nafasi kirib kelayotgan ushbu go‘zal pallada, nafosat va nazokat ayyomi — 8-mart Xalqaro xotin-qizlar kuni munosabati bilan siz azizlarni Buxoro davlat universiteti jamoasi nomidan chin qalbimdan samimiy muborakbod etaman.
Azaldan ayolni bahorga qiyoslaydilar. Zero, ayol bor joyda mehr bor, fayz bor, hayot bor. Ayolni e’zozlash, unga hurmat va ehtirom ko‘rsatish xalqimiz uchun yuksak ma’naviy qadriyat, milliy fazilat darajasiga ko‘tarilgan. Ayollarni umrimizning bahori, xonadonimizning chirog‘i, hayotimizning bezagi sifatida ulug‘lash — bu, avvalo, oilani, jamiyatni va Vatanimizni ulug‘lash demakdir.
Darhaqiqat, insonni komil inson etib tarbiyalaydigan, oilaga mustahkamlik, jamiyatga ma’rifat va barqarorlik baxsh etadigan zot ham — ayoldir. Siz, aziz va betakror ayollarimiz, sevgi va sadoqat, vafo va fidoyilik timsoli sifatida nafaqat xonadonlaringiz, balki butun jamiyatimiz taraqqiyotiga beqiyos hissa qo‘shib kelmoqdasiz.
Mamlakatimizda amalga oshirilayotgan keng ko‘lamli islohotlar zamirida ham, avvalo, opa-singillarimizning huquq va manfaatlarini himoya qilish, onalik va bolalikni qo‘llab-quvvatlash, xotin-qizlarning ta’lim olishi, kasb-hunar egallashi va jamiyat hayotida faol ishtirokini ta’minlash kabi ezgu maqsadlar mujassamdir. Bu esa ayol zotiga bo‘lgan yuksak e’tibor va ehtiromning yorqin ifodasidir.
Universitetimiz hayotida ham sizlarning o‘rningiz va nufuzingiz alohida ahamiyat kasb etadi. Ilm-fan, ta’lim-tarbiya, boshqaruv va jamoat ishlarida faoliyat yuritayotgan ustoz va xodimlarimiz, shuningdek, iqtidorli talaba-qizlarimiz oliygohimiz salohiyatini yuksaltirish, uning nufuzini mustahkamlash yo‘lida fidokorona mehnat qilmoqdalar. Boshlagan ezgu tashabbuslarimizning yuksak natijalarga erishishida siz aziz opa-singillarimizning hissangiz beqiyosdir.
Sizlarni yana bir bor ushbu qutlug‘ ayyom bilan muborakbod etar ekanman, har biringizga mustahkam sog‘lik, xonadonlaringizga tinchlik va fayzu baraka, qalbingizga quvonch va ilhom tilayman. Hayot yo‘lingiz doimo yorug‘, orzu-intilishlaringiz yuksak, ezgu maqsadlaringiz ro‘yobda bo‘lsin!
Yurtimiz ravnaqi, Vatanimiz obodligi va xalqimiz farovonligi yo‘lida amalga oshirayotgan sharafli faoliyatingizda ulkan muvaffaqiyatlar hamisha sizga yor bo‘lsin!
Hurmat bilan,
Obidjon Xamidov,
Buxoro davlat universiteti rektori iqtisodiyot fanlari doktori, professor.
