Buxoro shahrida ilk bor o‘tkazilgan “Bukhara International Mathematics Olympiad (BIMO–2026)” va “Bukhara International Chemistry Olympiad (BICHO–2026)” xalqaro olimpiadalari yuqori saviyada tashkil etildi. Ushbu nufuzli musobaqalarda 75 ta xorijiy va respublika oliy ta'lim muassasalaridan jami 95 ta jamoa ishtirok etdi.
“BICHO–2026” xalqaro kimyo olimpiadasida 41 ta jamoa qatnashib, Andijon davlat texnika instituti, Buxoro davlat universiteti (O‘zbekiston), Magtymguly Turkmen State University (Turkmaniston) hamda Rossiya xalqlar do‘stligi universiteti (RUDN, Rossiya) jamoalari Super kubok sovrindorlari bo‘ldi. Olimpiada davomida ishtirokchilar 19 ta oltin, 26 ta kumush va 40 ta bronza medal bilan taqdirlandilar.
“BIMO–2026” xalqaro matematika olimpiadasida esa 54 ta jamoa ishtirok etdi. Unda Xalqaro gumanitar fanlar va taraqqiyot universiteti (Turkmaniston), Rossiya xalqlar do‘stligi universiteti (RUDN), Andijon davlat universiteti, Toshkent xalqaro moliyaviy va texnologiyalar universiteti (O‘zbekiston) hamda Lomonosov nomidagi Moskva davlat universiteti (Rossiya) jamoalari Super kubok bilan taqdirlandi. Mazkur olimpiadada ishtirokchilar 29 ta oltin, 46 ta kumush va 56 ta bronza medal bilan taqdirlandilar.
“BIMO–2026” va “BICHO–2026” xalqaro olimpiadalari natijalariga ko‘ra, eng yuqori ko‘rsatkichlarni qayd etgan yetakchi oliy ta’lim muassasalari qatorida Buxoro davlat universiteti, Samarqand davlat pedagogika instituti, Magtymguly Turkmen State University (Turkmaniston), Rossiya xalqlar do‘stligi universiteti (RUDN, Rossiya) hamda Lomonosov nomidagi Moskva davlat universiteti (Rossiya) alohida ajralib turdi. Xususan, Buxoro davlat universiteti matematika va kimyo fanlari bo‘yicha umumiy hisobda eng ko‘p medallarni qo‘lga kiritib, 5 ta oltin, 3 ta kumush va 1 ta bronza medal (BIMO–2026), shuningdek 6 ta oltin, 1 ta kumush va 1 ta bronza medal (BICHO–2026) bilan yetakchi OTM sifatida e’tirof etildi. Samarqand davlat pedagogika instituti matematika fanida 5 ta oltin medalga sazovor bo‘ldi. Magtymguly Turkmen State University kimyo va matematika yo‘nalishlarida yuqori natijalar ko‘rsatib, jami 4 ta oltin va 1 ta kumush medalni qo‘lga kiritdi. RUDN University (Rossiya) ikki fan bo‘yicha barqaror natija qayd etib, jami 5 ta oltin, 2 ta kumush va 3 ta bronza medal bilan taqdirlandi. Lomonosov nomidagi Moskva davlat universiteti matematika fanida 3 ta oltin va 1 ta kumush medalga sazovor bo‘ldi. Shu bilan birga, olimpiadalarda Andijon davlat universiteti, Andijon davlat texnika instituti, Berdaq nomidagi Qoraqalpoq davlat universiteti, Guliston davlat universiteti, Farg‘ona davlat universiteti, Navoiy davlat universiteti, Qarshi davlat universiteti, Termiz davlat universiteti, Urganch davlat universiteti, Urganch davlat pedagogika instituti, Toshkent davlat iqtisodiyot universiteti, Toshkent axborot texnologiyalari universiteti, Toshkent xalqaro moliya va texnologiyalar universiteti, Samarqand davlat universiteti, Jizzax davlat pedagogika universiteti, Nukus davlat pedagogika instituti, shuningdek Turkmaniston, Rossiya, Xitoy va Tojikistonning qator yetakchi oliy ta’lim muassasalari talabalari ham faol ishtirok etib, oltin, kumush va bronza medallar bilan taqdirlandilar.
Mazkur natijalar xalqaro olimpiadalarning keng geografiya, kuchli raqobat va yuqori ilmiy saviya asosida tashkil etilganini, shuningdek ishtirokchi oliy ta’lim muassasalarida olib borilayotgan ta’lim va ilmiy-tadqiqot ishlarining samaradorligini yaqqol namoyon etdi. Mazkur xalqaro olimpiadalarda muvaffaqiyatli ishtirok etgan iqtidorli yoshlarni taqdirlash marosimi Buxoro davlat universitetida bo‘lib o‘tdi. Tadbir universitetning xalqaro hamkorlik bo‘yicha prorektori Abror Jo‘rayevning kirish so‘zi bilan ochildi.
Shuningdek, O‘zbekiston Respublikasi Fanlar akademiyasi V.I. Romanovskiy nomidagi Matematika instituti direktorining o‘rinbosari, akademik O‘tkir Roziqov tomonidan yo‘llangan videotabrik hamda Oliy ta’limni rivojlantirish tadqiqotlari markazi vakili Sherzod Rasulovning tabrik so‘zlari tinglandi. Tantanali marosimda matematika va kimyo fanlari bo‘yicha oltin, kumush va bronza medal sohiblari, shuningdek, Super kubok egalari taqdirlandi. Umumiy hisobda matematika yo‘nalishi bo‘yicha 30 ta, kimyo yo‘nalishi bo‘yicha 20 ta kubok topshirildi.
Olimpiadalarni tashkil etishda faol ishtirok etgan hakamlar, murabbiylar, volontyorlar va talabalar ham e’tirof etildi. “BIMO–2026” olimpiadasida Buxoro davlat universiteti talabalari yakka tartibda 5 ta oltin, 3 ta kumush va 1 ta bronza medalga sazovor bo‘ldi. Jamoaviy bahslarda “BukhSU” jamoasi Best Teamwork and Strategy Award, “Vertex” jamoasi esa Outstanding Logical Reasoning Award nominatsiyalarida g‘olib bo‘ldi. Olimpiadada 10 dan ortiq davlatdan 500 nafardan ziyod talabalar ishtirok etdi. “BICHO–2026” xalqaro kimyo olimpiadasida esa universitet talabalari 6 ta oltin, 1 ta kumush va 1 ta bronza medalni qo‘lga kiritib, “Excellence in Chemical Data Interpretation” nominatsiyasi hamda kimyo fani bo‘yicha Super kubok sovriniga sazovor bo‘ldilar.
Mazkur natijalar Buxoro davlat universitetida yaratilgan zamonaviy ta’lim muhiti va iqtidorli yoshlarni qo‘llab-quvvatlashga qaratilgan tizimli ishlarning samarasi ekanligi bilan ahamiyatlidir.
