Bugun Buxoro davlat universitetida Qozon federal universitetining nufuzli vakillari bilan uchrashuv bo‘lib o‘tdi. Tashrif doirasida tibbiyot fizikasi yo‘nalishida qo‘shma ta’lim dasturini yo‘lga qo‘yish masalalari muhokama qilindi.
Uchrashuvda Qozon federal universiteti tomonidan ta’lim faoliyati bo‘yicha prorektor Turilova Yekaterina Aleksandrovna hamda Fizika instituti direktori Pominov Andrey Ivanovich ishtirok etdi. Mehmonlar bilan Buxoro davlat universitetining xalqaro hamkorlik bo‘yicha prorektori Abror Jo‘rayev uchrashib, ikki oliy ta’lim muassasasi o‘rtasida hamkorlik aloqalarini yanada rivojlantirish masalalarini muhokama qildi.
Muzokaralar davomida tibbiyot fizikasi yo‘nalishi bo‘yicha mavjud o‘quv rejalari atroflicha o‘rganildi, ta’lim jarayonini tashkil etish, akademik almashinuv va qo‘shma dasturlarni amalga oshirish bo‘yicha fikr almashildi. Uchrashuv yakunida mazkur yo‘nalishda o‘zaro hamkorlikni yo‘lga qo‘yish bo‘yicha kelishuvga erishildi.
Mazkur uchrashuv Buxoro davlat universitetining xalqaro hamkorlik aloqalarini kengaytirish, zamonaviy va istiqbolli ta’lim yo‘nalishlari bo‘yicha qo‘shma dasturlarni joriy etish yo‘lidagi muhim qadamlardan biri bo‘ldi.
