Ayni vaqtda Buxoro davlat universiteti rahbar xodimlari va professor-o‘qituvchilardan iborat delegatsiya xizmat safari doirasida Xitoy Xalq Respublikasining Shinjon hududida bo‘lib, qator muhim uchrashuv va muzokaralarni amalga oshirmoqda.
Tashrif davomida qishloq xo‘jaligi va iqtisodiyot sohalarida ilmiy-tadqiqot hamda innovatsion hamkorlikni rivojlantirish, xususan, qishloq xo‘jaligini raqamlashtirish, sun’iy intellekt va zamonaviy axborot texnologiyalarining agrar sohadagi o‘rni va ahamiyatiga oid masalalar atroflicha muhokama qilinmoqda.
Dastlab, Shinjon Qishloq xo‘jalik akademiyasi direktorining o‘rinbosari professor Tursunjon Muhammad hamda Shinjon “Do‘stlik” paxtachilik agroklasteri direktori janob prof. Vang bilan uchrashuv bo‘lib o‘tdi. Mazkur uchrashuvda Buxoro davlat universiteti o‘quv-tajriba xo‘jaligi yer maydonlarida tajriba tariqasida g‘o‘za ekish, amaliy ilmiy tajribalarni yo‘lga qo‘yish, o'zaro manfaatli hamkorlik istiqbollari yuzasidan batafsil fikr almashildi. Muzokaralar davomida tomonlar tomonidan aniq va amaliy takliflar ilgari surildi.
Shuningdek, delegatsiya Shinjon universiteti huzuridagi Qishloq xo‘jaligini raqamlashtirish (Smart Agriculture) institutiga tashrif buyurdi. Institut direktori va uning o‘rinbosarlari bilan o‘tkazilgan uchrashuvda aqlli qishloq xo‘jaligi tizimlari, sun’iy intellekt asosida ekinlar hosildorligini bashoratlash, raqamli boshqaruv, masofaviy monitoring va zamonaviy sensor texnologiyalar bilan jihozlangan laboratoriyalar, ilmiy-texnik baza va innovatsion infratuzilma bilan yaqindan tanishildi.
Uchrashuvlar davomida “Bir makon — bir yo‘l” xalqaro tashabbusi doirasida raqamli va innovatsion qishloq xo‘jaligi loyihalarini amalga oshirish, qo‘shma ilmiy tadqiqotlar olib borish hamda ilmiy natijalarni amaliyotga tatbiq etish masalalari muhokama qilindi.
Bundan tashqari, Shinjon universitetining iqtisodiyot sohasidagi yetuk olimlari bilan olib borilgan muhokamalar chog‘ida Buxoro davlat universiteti "Ilmiy axborotnomasi" jurnali tahrir hay’ati tarkibiga xorijiy mutaxassislarni, jumladan iqtisodiyot va raqamli qishloq xo‘jaligi bo‘yicha olimlarni jalb etish masalalari ham ko‘rib chiqildi. Ushbu tashabbus ilmiy nashrlar sifatini oshirish va ularning xalqaro nufuzini mustahkamlashga xizmat qilishi ta’kidlandi.
Mazkur uchrashuvlar xalqaro ilmiy hamkorlikni kengaytirish, qishloq xo‘jaligida raqamli texnologiyalar va sun’iy intellektni joriy etish, innovatsion tajribalarni amaliyotga tatbiq etish hamda zamonaviy agrar va iqtisodiy sohalar rivojiga xizmat qilishi bilan alohida ahamiyatga ega.
