Buxoro davlat universiteti nafaqat o'z talabalari, balki keng jamoatchilik orasida ham ekologik madaniyatni yuksaltirishga hissa qo'shmoqda. Shu maqsadda Buxoro soliq texnikumida universitetimizning Tabiiy fanlar va agrobiotexnologiya fakulteti Ekologiya va geografiya kafedrasi dotsenti (PhD) M.K.Ergasheva tashabbusi bilan “Ekologik mas’uliyat haftaligi” doirasida “Ekofotolavha” nomli fototanlov o‘tkazildi.
Tanlovda texnikumning 30 nafar iqtidorli o‘quvchisi o‘z ijodiy ishlari bilan ishtirok etdi. Ular o'z fotolarida ona tabiat go'zalligi, mavjud ekologik muammolar va ularni bartaraf etishga oid o'z qarashlarini badiiy tarzda aks ettirdilar. Hay'at a'zolari ishlarni baholashda kreativ yondashuv va g'oyaning mazmuniga alohida e'tibor qaratdilar. Tanlov yakunida eng munosib ishlar aniqlanib, g'oliblar taqdirlandi.
Bu kabi hamkorlikdagi tadbirlar yoshlarda tabiatga nisbatan mas'uliyat hissini shakllantirish va universitetning ijtimoiy hayotdagi faol o‘rnini ko‘rsatishda muhim ahamiyatga ega.
