Bugun Buxoro davlat universiteti rektori Obidjon Xamidov Ozarbayjonning nufuzli ilmiy-ta’lim muassasasi — "BZT Turan Academy" vakili, siyosiy fanlar bo'yicha falsafa doktori (PhD), dotsent Farahila Babayeva-Shukurova bilan uchrashuv o‘tkazdi.
Muloqot davomida ikki tomonlama hamkorlikni kengaytirish, qo‘shma ilmiy loyihalar, ta’lim dasturlari hamda xalqaro tadbirlarni birgalikda tashkil etish masalalari muhokama qilindi.
Uchrashuv jarayonida akademiya tomonidan taqdim etilayotgan istiqbolli yo‘nalishlar, qo‘shma konferensiyalar, ilmiy seminarlar, professor-o‘qituvchilar va tadqiqotchilar uchun almashinuv dasturlari bo‘yicha takliflar ko‘rib chiqildi. Tomonlar o‘zaro hamkorlikni mustahkamlash BuxDUda xalqaro ilmiy aloqalar ko‘lamini yanada kengaytirishi, talaba va o‘qituvchilar uchun yangi imkoniyatlar yaratishini ta’kidladilar.
Uchrashuv yakunida, Farahila Babayeva-Shukurova tomonidan Buxoro davlat universiteti rektori Obidjon Xamidovga “Faxriy professor” unvoni tantanali ravishda topshirildi. Mazkur unvon rektorning ilm-fan rivojiga qo‘shgan hissasi, xalqaro hamkorlikni kuchaytirish borasidagi sa’y-harakatlari va ta’lim sohasidagi samarali faoliyati uchun berildi.
Buxoro davlat universiteti mazkur hamkorlik O‘zbekiston oliy ta’lim muassasalari xalqaro nufuzini oshirish, ilmiy integratsiyani kuchaytirish va sifatli ta’lim jarayonlarini takomillashtirishda muhim ahamiyat kasb etishini qayd etadi.
