Buxoro davlat universiteti rektori Obidjon Xamidov Syracuse universitetida tahsil olayotgan o‘zbekistonlik yoshlar bilan uchrashib, ularning o‘qish jarayoni, ilmiy izlanishlari va kelgusi rejalarini batafsil o‘rgandi.
Uchrashuv chog‘ida, xususan, Oyatillo Nuraliev Davlat siyosati va boshqaruvi yo‘nalishida Humphrey Fellowship dasturi bo‘yicha tahsil olayotgani qayd etildi. “El-yurt umidi” jamg‘armasi orqali Syracuse universitetida o‘qiyotgan Samijonov Nurmuhammad — Xalqaro munosabatlar yo‘nalishida magistratura bosqichida tahsil olmoqda. Rektor yoshlarning akademik natijalari, ilmiy izlanishlari va erishayotgan yutuqlari bilan yaqindan tanishdi.
Uchrashuvlarda shuningdek Mirjahon Turdiyevning faoliyati ham muhokama qilindi. U O‘zbekiston va bir qator xorijiy davlatlarda nogironligi bo‘lgan shaxslar uchun ijtimoiy adolat va inson huquqlarini himoya qilish borasida katta amaliy tajribaga ega. Mirjahon BMT, JICA, USAID va boshqa xalqaro tashkilotlarda rahbarlik hamda maslahatchilik lavozimlarida ishlagan, hozirda Markaziy Osiyo va Kavkaz Talabalar Ittifoqi Prezidenti sifatida faoliyat yuritadi. 2020-yilda esa Syracuse universitetida xilma-xillik va inklyuziyani rivojlantirishga qo‘shgan hissasi uchun La Fuerza Community Enhancement Award bilan taqdirlangan. Suhbat davomida rektor va Mirjahon Turdiyev o‘rtasida AQSHdagi ilg‘or kurslarni Buxoroda tashkil etish, o‘quv jarayoniga zamonaviy ta’lim texnologiyalarini joriy etish va hamkorlikning yangi yo‘nalishlarini kengaytirish bo‘yicha takliflar muhokama qilindi.
BuxDU delegatsiyasining ushbu uchrashuvlari universitetning xalqaro hamkorlik aloqalarini mustahkamlash, yoshlar uchun yangi imkoniyatlar yaratish va ta’lim sifatini yanada oshirishga xizmat qiladi.
