Berlin shahrida O‘zbekiston va Germaniya oliy ta’lim muassasalari o‘rtasidagi hamkorlikni mustahkamlashga qaratilgan O‘zbekiston–Germaniya universitetlari rektorlarining birinchi forumi bo‘lib o‘tdi. Nufuzli tadbirda Buxoro davlat universiteti nomidan xalqaro hamkorlik bo‘yicha prorektor Abror Jo‘rayev hamda Nemis filologiyasi kafedrasi mudiri Yarash Ro‘ziyev ishtirok etdi.
Forum doirasida universitetimiz uchun muhim kelishuvlarga erishildi va qator yutuqlar e’tirof etildi:
Potsdam amaliy fanlar universiteti bilan hamkorlik: Erasmus+ kredit mobilligi loyihasi doirasida 2026-2027 oʻquv yilida grant asosida 7 nafar professor-oʻqituvchi va talaba almashinuvi amalga oshiriladi.
ACQUIN agentligi bilan kelishuv: ACQUIN xalqaro akkreditatsiya agentligi bilan hamkorlikni davom ettirish bo‘yicha shartnoma imzolandi. Unga ko‘ra, BuxDU va ACQUIN O‘zbekiston OTMlari uchun akkreditatsiya bo‘yicha maslahat seminarlarini tashkil etadi.
Maxsus e’tirof: Universitetimizga O‘zbekistonda birinchi bo‘lib 16 ta ta’lim dasturini muvaffaqiyatli akkreditatsiyadan o‘tkazgani va boshqa OTMlarga konsultativ yordam ko‘rsatayotgani uchun Tashakkur sertifikati topshirildi.
Shuningdek, forumda qo‘shma ta’lim dasturlarini kengaytirish, Germaniyada amaliyot va stajirovkalarni rivojlantirish hamda ilmiy-tadqiqot loyihalarini qo‘llab-quvvatlash kabi strategik masalalar muhokama qilindi.
Mazkur forum ikki davlat oliy taʼlim muassasalari oʻrtasidagi hamkorlikni mustahkamlash va yangi loyihalarni amalga oshirish uchun muhim platforma vazifasini oʻtadi.
