Har yili 13-noyabr kuni dunyo miqyosida ko‘zi ojiz insonlarning huquqlarini himoya qilish kuni sifatida nishonlanadi. Ushbu sana bizni yana bir bor inson qadr-qimmatining yagonaligini, imkon emas — iroda va iymon kuchi bor joyda yuksak natijalarga erishish mumkinligini eslatadi.
Buxoro davlat universitetida imkoniyati cheklangan, jumladan, ko‘zi ojiz talabalar uchun barcha zarur shart-sharoitlar yaratilgan. Universitetda ular uchun maxsus o‘quv-uslubiy vositalar, elektron resurslardan foydalanish imkoniyatlari, adaptiv ta’lim muhitlari joriy etilgan. Bugun biz faxr bilan ayta olamizki, ana shunday azm-u shijoatli yoshlarimiz o‘qish va ijodda, fan va san’atda yuksak yutuqlarga erishib, tengdoshlariga ibrat bo‘lib kelmoqdalar.
Ularning hayotiy irodasi, bilimga tashnaligi, jamiyatda o‘z o‘rnini topishga bo‘lgan intilishi biz uchun faxr va ilhom manbaidir. Biz, o‘qituvchilar va butun BuxDU jamoasi, ularning salohiyatini to‘liq namoyon etishi uchun doimo yelkadosh bo‘lamiz.
Ushbu qutlug‘ kunda barcha ko‘zi ojiz fuqarolarni, ayniqsa, Buxoro davlat universitetining bilimga chanqoq, izlanuvchan talabalarini chin qalbimdan tabriklayman. Sizlarga sog‘lik, bardavom ilhom va porloq kelajak sari qat’iyatli qadamlar tilayman.
Sizlarning yutuqlaringiz — bizning faxrimiz, sizlarning orzularingiz — bizning burchimizdir.
Hurmat bilan,
Obidjon Xamidov
Buxoro davlat universiteti rektori,
iqtisodiyot fanlari doktori, professor
