Buxoro davlat universiteti Yoshlar ittifoqi “BuxDU Volontyorlar markazi” tashabbusi bilan Ko'zi ojizlar jamiyati Buxoro viloyati Kengashi hamkorligida 13-noyabr- "Butunjahon ko'zi ojizlar huquqlarini himoya qilish kuni" munosabati bilan “Mehr, e’tibor va imkon — barchamiz uchun!” shiori ostida tadbir bo'lib o'tdi.
Tadbir ko'zi ojizlar madhiyasi ijrosi bilan boshlandi. Tadbirni Buxoro davlat universitetining Yoshlar masalalari va ma’naviy-ma’rifiy ishlar bo‘yicha birinchi prorektori Dilshod Yavmutov kirish so'zi bilan ochib berdi. Shuningdek, bugungi ko'rgazmada o'z mahsulotlari bilan ishtirok etayotgan O'zbekiston tiflomarket rahbari Panjiyev Shokir so'zga chiqib, o'z tashkiloti haqida ma'lumot berib o'tdi. Tadbir davomida olamni qalbi bilan ko'radigan insonlarga bag'ishlangan videorolik namoyish etildi.
Tadbir so‘ngida ijodiy chiqishlar barchaga bayramona kayfiyat ulashdi — Ramazonova Anora, Baxtiyor Fayziyev va “Nurli maskan” maktabi o'quvchilari sahnaga ko‘tarilib, samimiy kuylar orqali mehr va umid tuyg‘ularini ifoda etdilar. Shundan so‘ng O‘zbekiston Respublikasi Maxsus ko‘zi ojizlar kutubxonasi vakili so‘zga chiqib, kutubxonaning faoliyati, imkoniyati cheklangan fuqarolarga yaratilayotgan shart-sharoitlar haqida ma’lumot berdi.
O‘zbekiston Respublikasi Ko‘zi ojizlar jamiyati Buxoro viloyati bo‘limi raisi Jalil Rahmatov ham so‘zga chiqib, ushbu ezgu tashabbusni amalga oshirishda yaqindan ko‘mak bergan BuxDU doktoranti Dilshodjon To‘ymurodov va universitet jamoasiga samimiy minnatdorlik bildirdi. Shuningdek, Vobkent tuman Ko‘zi ojizlar jamiyati raisi Ulug‘bek To‘xtayev o‘zining sobiq ustozi, BuxDU vakili Feruz Karimovga minnatdorchilik bildirib, Tashakkurnoma topshirdi.
