Ayni kunlarda Buxoro davlat universiteti rektori, iqtisodiyot fanlari doktori, professor Obidjon Xamidov Amerika Qo'shma Shtatlarida Buxoro viloyatidagi tadbirkorlar hamda yirik investitsiya rahbarlari bilan safarda bo'lib turibdi. Delegatsiya ilk kunda AQSHning nufuzli kompaniyalaridan biri Plug and play kompaniyasiga tashrif buyurdi.
Uchrashuv davomida ikki tomonlama hamkorlikni kengaytirish, startap loyihalarni moliyalashtirish, sun’iy intellekt yo‘nalishida qo‘shma tashabbuslarni ilgari surish masalalari muhokama qilindi. Shuningdek, O‘zbekiston Respublikasi Prezidentining qarorlariga muvofiq, zamonaviy texnologiyalarni rivojlantirishda xalqaro tajribani samarali qo‘llash bo‘yicha kelishuvlarga erishildi.
“Plug and Play”ning bosh vazifasi - startaplar uchun akseleratsiya dasturlarini ishga tushirish, ularni venchur fondlari va korporatsiyalar bilan bog‘lash. 2006-yilda ishga tushirilgandan buyon platforma turli mamlakatlardan 35 ta startapga “unicorn” kompaniyaga aylanishga yordam berdi.
Bugungi kunga kelib kompaniya 25 ta soha bo‘yicha 60 dan ortiq manzilga kengaydi va 550 dan ziyod hamkorlar bilan ishlayapti (jumladan, O'zbekiston). Shu paytgacha 2 000 dan ortiq kompaniyaga sarmoya kiritdi. Ushbu o‘sish orqali kompaniyaning “innovatsiyani istalgan joyda va istalgan kishi uchun ochiq qilish” haqidagi qarashi yanada kengaymoqda.
