Ko‘rgazmada Yaponiya universitetlari rasmiy vakillari, jumladan, University of Tsukuba, Osaka University, Toyo University, Ritsumeikan Asia Pacific University (APU), The University of Tokyo, Keio University Shonan Fujisawa Campus, Kyoto University of Advanced Science, Nagoya University xalqaro ta’lim tashkilotlari hamda yapon grant va stipendiya dasturlari koordinatori ishtirok etdi. Ular tomonidan bakalavr, magistratura va doktorantura bosqichlarida o‘qish imkoniyatlari, kirish talablari hamda ta’lim dasturlari haqida universitet foyesida batafsil ma’lumot berildi. Shuningdek, BuxDU bazasida joylashgan O‘zbekiston-Yaponiya markazi ham o‘z ko‘rgazmalari bilan ishtirok etdi.
Tadbirning ochilish marosimini Buxoro viloyati hokimining yoshlar siyosati, ijtimoiy rivojlantirish va ma’naviy-ma’rifiy ishlar bo‘yicha o‘rinbosari Baxtiyor Adilov ochib berdi. Shuningdek, O‘zbekiston–Yaponiya markazi direktori Ivazaki Xiro ham so‘zga chiqib, Buxoro davlat universiteti bilan hamkorlikning samaradorligini e’tirof etdi. “Japan Education Fair 2025” — bu Buxoro davlat universiteti talabalari uchun Yaponiyada o‘qish, xalqaro tajriba orttirish va yangi imkoniyatlar sari yo‘l ochuvchi muhim platforma bo‘lib xizmat qildi.
