Toshkent shahrida davom etayotgan O‘zbekiston–Xitoy II Ta’lim forumining ikkinchi kuni samarali uchrashuvlar va yangi hamkorlik tashabbuslariga boy bo‘ldi. Forumda Buxoro davlat universiteti rektori, iqtisodiyot fanlari doktori, professor Obidjon Xamidov hamda Xalqaro hamkorlik departamenti boshlig‘i Shohabbos Sharofiddinov ishtirok etib, Xitoyning nufuzli oliy ta’lim muassasalari bilan uchrashuvlar o‘tkazdilar. Uchrashuvlarda ta’lim, ilm-fan, raqamli texnologiyalar va ilmiy tadqiqotlar yo‘nalishlarida o‘zaro hamkorlikni kengaytirish masalalari muhokama qilindi.
Jumladan, Pekin Normal universiteti (Beijing Normal University, QS–2026 reytingida 247-o‘rin, THE–2026 reytingida 134-o‘rin) bilan ijtimoiy fanlar, falsafa va huquq yo‘nalishlarida qo‘shma ilmiy loyihalar, shuningdek, yozgi va qishki maktablarni tashkil etish bo‘yicha kelishuvga erishildi. Lanjou universiteti (Lanzhou University, QS–2026 reytingida 791–800 guruh) bilan BuxDUda xitoy tilini ikkinchi til sifatida o‘qitish dasturini yo‘lga qo‘yish, qo‘shma ta’lim dasturlari hamda seminar-treninglar tashkil etish masalalari muhokama qilindi.
Shinjon qishloq xo‘jaligi universiteti (Xinjiang Agricultural University) bilan agronomiya va biologiya sohalarida hamkorlikni mustahkamlash, xorijiy grantlar asosida zamonaviy ilmiy laboratoriyalar va issiqxonalar tashkil etish, shuningdek, qishloq xo‘jaligida sun’iy intellekt (AI) texnologiyalarini joriy etish yuzasidan fikr almashildi.
Ushbu uchrashuvlar O‘zbekiston–Xitoy ta’lim aloqalarini yanada rivojlantirish, ilmiy hamkorlikni chuqurlashtirish va xalqaro miqyosda qo‘shma loyihalar sonini oshirishga xizmat qiladi.
