“Global va milliy iqtisodiyot trendlari: Oʻzbekiston–2030 strategiyasi” IV Xalqaro forumi doirasida Buxoro davlat universiteti rektori Obidjon Xamidov Xitoyning Nanking audit universiteti vakillari — Akademik tadqiqotlar ofisi boshlig‘i Chen Yunyao hamda Ijtimoiy audit maktabi professori Wang Hui bilan uchrashuv o‘tkazdi. Uchrashuvda, shuningdek, BuxDU Buxgalteriya hisobi va statistika kafedrasi mudiri Sunnatov Yusuf ham ishtirok etdi.
Suhbat davomida ikki oliy ta’lim muassasasi o‘rtasida ilmiy-tadqiqot faoliyati, davlat moliyaviy nazorati va auditi bo‘yicha tajriba almashish, talabalar almashinuvi, shuningdek professor-o‘qituvchilarning Nanking audit universitetida malaka oshirishi masalalari muhokama qilindi.
Shuningdek, tomonlar qo‘shma onlayn seminarlar tashkil etish, grant dasturlari va xalqaro loyihalarda birgalikda ishtirok etish, innovatsion ta’lim dasturlarini yo‘lga qo‘yish hamda iqtisodiy tadqiqotlar yo‘nalishida qo‘shma tashabbuslarni amalga oshirish borasida kelishuvga erishdilar. Ushbu uchrashuv BuxDUning xalqaro hamkorlik geografiyasini yanada kengaytirish, shuningdek, “Oʻzbekiston–2030” strategiyasi maqsadlariga muvofiq ilm-fan va ta’lim integratsiyasini chuqurlashtirish yo‘lida muhim qadam bo‘ldi.
