Buxoro davlat universitetida Koreya Fan va ilg‘or texnologiyalar instituti (KAIST) professorlari bilan uchrashuv doirasida “Amaliy matematika, hisoblash texnologiyalari va sun’iy intellekt” yo‘nalishlariga bag‘ishlangan ilmiy seminar o‘tkazildi. Seminar davomida KAIST professorlari Li Chang-Ok, Xvan Ganguk va Kim Dongxvan amaliy matematika, mashinali o‘qitish algoritmlari, hisoblash matematikasi va sun’iy intellekt texnologiyalarini rivojlantirishga doir o‘z tadqiqot natijalari bilan o‘rtoqlashdilar.
Tadbirda BuxDUning Amaliy matematika va axborot texnologiyalari kafedrasi professor-o‘qituvchilari, doktorantlar, magistrlar hamda O‘zbekiston Respublikasi Fanlar akademiyasi Matematika instituti olimlari faol ishtirok etdilar. Ishtirokchilar ilg‘or texnologiyalarni ta’lim va ilmiy jarayonlarga tatbiq etish bo‘yicha o‘z fikr-mulohazalarini bildirdilar.
Seminar yakunida tomonlar o‘rtasida ilmiy-innovatsion hamkorlikni yanada kengaytirish, qo‘shma tadqiqot loyihalari, akademik almashinuv dasturlari va doktorantura yo‘nalishlarida o‘zaro tajriba almashish masalalarida kelishuvga erishildi.
