Buxoro davlat universitetida Yevropa Ittifoqining Erasmus+ CBHE dasturi doirasidagi “ESGCA” (Environmental, Social and Governance Capacity Building in Central Asia) loyihasi asosida “ESG: Social Sciences Topics” nomli xalqaro seminar davom ettirmoqda. Seminarning asosiy maqsadi — oliy ta’lim tizimida ESG tamoyillarini o‘quv dasturlariga integratsiya qilish, ijtimoiy mas’uliyat, barqaror rivojlanish, yashil iqtisodiyot va inson resurslarini boshqarish borasida xalqaro tajriba almashish hamda hamkorlik mexanizmlarini kuchaytirishdan iboratdir.
Dastur doirasida ishtirokchilar inson huquqlari, gender tengligi, ta’limda inklyuzivlik, barqaror HRM (Human Resource Management) va ijtimoiy barqarorlik mavzulari yuzasidan nazariy va amaliy mashg‘ulotlarda qatnashmoqdalar. Tadbir jarayonida interaktiv treninglar, guruhli muhokamalar, mahorat darslari tashkil etilib, ESG konsepsiyasining oliy ta’limdagi o‘rni, uning ijtimoiy va iqtisodiy barqarorlikka ta’siri haqida fikr almashildi.
Seminar Yevropa va Markaziy Osiyo mamlakatlari oliy ta’lim muassasalari o‘rtasidagi hamkorlikni rivojlantirish, ESG (Environmental — atrof-muhit, Social — ijtimoiy, Governance — boshqaruv) tamoyillarini ta’lim tizimiga joriy etish, ijtimoiy barqarorlik, inklyuzivlik va barqaror inson resurslarini boshqarish bo‘yicha yangi yondashuvlarni muhokama qilishga qaratilgan. Seminar doirasida Yevropa Ittifoqi davlatlarining nufuzli universitetlari — Genuya universiteti (Italiya), Slovakiya Texnologiya universiteti (STUBA), “Lucian Blaga” universiteti (Ruminiya) kabi hamkor oliygohlar vakillari ham ishtirok etishmoqda. Ular o‘z tajribalari asosida ta’limda ESG tamoyillarini samarali joriy etish, korporativ ijtimoiy mas’uliyatni rivojlantirish, hamda barqaror rivojlanish siyosatini ta’lim tizimi bilan uyg‘unlashtirish bo‘yicha tavsiyalar berdilar.
Seminar davomida ishtirokchilar o‘zaro fikr almashib, O‘zbekiston va Markaziy Osiyo oliy ta’lim muassasalarida ESG yo‘nalishidagi ta’lim dasturlarini yanada takomillashtirish bo‘yicha amaliy takliflar ishlab chiqdilar. Seminarning dastlabki ikki kuni natijasida ESGCA loyihasi ishtirokchilari barqaror rivojlanish maqsadlari, inson resurslarini boshqarish va ijtimoiy mas’uliyat yo‘nalishida yangi g‘oyalar va hamkorlik tashabbuslarini ilgari surdilar.
Mazkur seminar Erasmus+ dasturi tomonidan moliyalashtirilgan bo‘lib, Yevropa va Markaziy Osiyo mamlakatlari oliy ta’lim muassasalari o‘rtasida uzoq muddatli akademik hamkorlikni mustahkamlash, shuningdek, ta’lim tizimida ijtimoiy va ekologik mas’uliyatni oshirishga xizmat qilmoqda.
