Buxoro davlat universiteti va Sankt-Peterburg davlat iqtisodiyot universiteti hamkorligida, universitetning 95 yilligiga bag‘ishlab, “Yashil iqtisodiyot: ko‘p qutbli iqtisodiyot sharoitida ekologiya va tabiiy resurslardan foydalanish muammolari” mavzusidagi II Xalqaro ilmiy-amaliy anjuman bo‘lib o‘tdi.
Tadbirni Buxoro davlat universiteti rektori Obidjon Xamidov kirish so‘zi bilan ochib berdi. Anjumanda yurtimiz va xorijiy mamlakatlardan taniqli olimlar, mutaxassislar hamda yosh tadqiqotchilar ishtirok etishdi. Anjumanda zamonaviy iqtisodiyot, ekologiya, barqaror rivojlanish va tabiiy resurslardan oqilona foydalanish masalalari yuzasidan dolzarb mavzular muhokama qilindi. Tadbir ilmiy hamkorlikni mustahkamlash, yangi g‘oyalarni amaliyotga joriy etish va xalqaro tajriba almashish uchun muhim maydon bo‘ldi.
Anjuman davomida xorijiy va mahalliy olimlarning ilmiy ma’ruzalari tinglandi. Jumladan:
Asaul Anatoliy Nikolaevich – iqtisodiyot fanlari doktori, professor, Sankt-Peterburg davlat arxitektura-qurilish universiteti professor-konsultanti, Rossiya Federatsiyasining xizmat ko‘rsatgan fan arbobi;
Bagiev Georgiy Leonidovich – Rossiya Federatsiyasi xizmat ko‘rsatgan olimi, Sankt-Peterburg davlat iqtisodiyot universiteti Menedjment va innovatsiyalar kafedrasi professori, “Interaction Marketing” ilmiy maktabi rahbari;
Turabova Xulkar Rustamovna – Buxoro davlat universiteti “Yashil iqtisodiyot va agrobiznes” kafedrasi mudiri;
Oripov Mahmud Ashurovich – iqtisodiyot fanlari nomzodi, dotsent, Buxoro davlat universiteti “Yashil iqtisodiyot va agrobiznes” kafedrasi dotsenti;
hamda boshqa olimlar o‘z ilmiy ma’ruzalari bilan qatnashdilar.
Ma’ruzalarda barqaror iqtisodiy taraqqiyot, ekologik muammolar, innovatsiyalar va tabiiy resurslardan oqilona foydalanish masalalari atroflicha yoritildi. Anjuman doirasida professor Asaul Anatoliy Nikolaevich tomonidan iqtisodiyot va ekologiyaning ramzi sifatida Buxoro davlat universiteti Ilmiy ishlar va innovatsiyalar bo‘yicha prorektori Samiyev Kamoliddin A‘zamovichga elektrobus prototipi hamda qimmatli ilmiy kitob sovg‘a qilindi.
Ushbu ramziy sovg‘alar ikki oliygoh o‘rtasidagi ilmiy hamkorlik va do‘stona aloqalarning mustahkamlanayotganini ifodalaydi Anjuman yakunida ilmiy tajriba almashish, ekologik barqarorlikni ta’minlash hamda ko‘p qutbli iqtisodiyot sharoitida yangi yechimlarni izlash yo‘lida kelishuvlar va kelgusidagi hamkorlik yo‘nalishlari belgilab olindi.
