Buxoro davlat universitetining 95 yilligiga bag‘ishlab “Russhunoslik va turkologiya: adabiy an’analar, madaniy transfer va tarjima” mavzusida xalqaro forum bo‘lib o‘tmoqda. Tadbir BuxDU hamkorligida Qozon federal universiteti, M.V. Lomonosov nomidagi Shimoliy (Arktika) federal universiteti, Yevroosiyo milliy universiteti, Navoiy davlat universiteti va Buxoro davlat pedagogika instituti bilan birgalikda tashkil etildi.
Forumni BuxDU rektori, professor Obidjon Xamidov kirish so‘zi bilan ochib, xalqaro ilmiy hamkorlikning bugungi dolzarb masalalari, rus tili va turkologiyaning zamonaviy rivojlanish tendensiyalari hamda madaniy transfer va tarjimaning global ahamiyati haqida to‘xtaldi.
Forum dasturi doirasida yalpi majlis, oltita tematik seksiyalar, lingvoekologik maktab, madaniy dasturlar va konsert o‘tkazilishi rejalashtirilgan. Tadbirda Rossiya, Qozog‘iston, O‘zbekiston va boshqa davlatlardan taniqli olimlar ishtirok etib, tarjimashunoslik, adabiyotshunoslik, turkologiya va til o‘qitish metodikasidagi dolzarb masalalarni muhokama qilishmoqda.
Forum doirasida Qozon federal universiteti professori, filologiya fanlari doktori Alfiya Shavkatovna Yusupovaga Buxoro davlat universitetining Faxriy professori unvoni tantanali ravishda topshirildi. KFU – BuxDUning strategik hamkorlaridan biri bo‘lib, o‘quv jarayonida o‘qituvchilar stajirovkalari, ilmiy loyihalar, talabalar almashinuvi, startaplar, qo‘shma ta’lim dasturlari va xalqaro nashrlar doimiy yo‘lga qo‘yilgan. Professor Alfiya Yusupova nafaqat Rossiyada, balki jahon ilmiy hamjamiyatida ham tan olingan olima. Uning tashabbusi bilan KFUda “Mirzo Ulug‘bek zali” va “O‘zbek tili burchagi” ochilgan bo‘lib, bu ikki xalq o‘rtasidagi madaniy-ma’rifiy hamkorlik ramzi sifatida katta ahamiyat kasb etmoqda.
Shuningdek, u BuxDU filologiya fakulteti professorlari bilan hamkorlikda qator monografiyalar, lug‘atlar va ilmiy maqolalar yaratgan, shuningdek, “Turkologiya”, “Zamonaviy rus tili” va “Til tarixi” kabi fanlardan ma’ruzalar o‘qib, yosh mutaxassislar tayyorlashga beqiyos hissa qo‘shib kelmoqda. Professor Yusupovaga Faxriy professor unvonining berilishi uning ilmiy faoliyati, xalqaro hamkorlikdagi xizmatlari va o‘zaro do‘stlik aloqalarini mustahkamlashdagi sa’y-harakatlariga yuksak ehtirom ifodasidir.
