Buxoro davlat universitetida Sharq falsafasining jahon miqyosidagi o‘rni, qiyosiy masalalari, zamonaviy falsafaning rivojlanish tamoyillari hamda innovatsion yondashuvlarni rivojlantirishga bag‘ishlangan xalqaro ilmiy-amaliy anjuman bo‘lib o‘tdi. Mazkur anjuman Buxoro davlat universiteti, Al-Azhar universiteti (Qohira, Misr), Islom tarixi, san’ati va madaniyati tadqiqot markazi (Turkiya, Istanbul), Ural Federal universiteti (Rossiya), Qozog‘iston Milliy universiteti (Al-Farobiy nomidagi) hamda O‘zbekiston xalqaro islomshunoslik akademiyasi hamkorligida tashkil etildi.
Tadbirni BuxDU rektori Obidjon Xamidov ochib berib, Sharq falsafasining bugungi global ilmiy jarayonlardagi ahamiyati va yosh tadqiqotchilar uchun yangi ilmiy ufqlarni belgilashdagi o‘rniga alohida to‘xtaldi. Anjumanda dunyoning yetakchi oliy ta’lim muassasalari vakillari o‘z ilmiy qarash va izlanishlari bilan o‘rtoqlashdilar. Jumladan:
Yuliya Vladimirovna Zapariy – Ural Federal universiteti falsafa kafedrasi professori, Scopus hay’ati a’zosi,
Vildanova Gyuzel Bulatovna – UFA fan va texnologiyalar universiteti professori,
Neslihan Durak – Inonu universiteti professori,
Hafiza Salomova – BuxDU professori, Islom tarixi va manbashunosligi, falsafa kafedrasi,
Qurbon Shadmanov – Buxoro davlat tibbiyot instituti professori, falsafa fanlari doktori
o‘z ma’ruzalari bilan ishtirok etdilar.
Anjumanda Sharq falsafasining qadimgi manbalardan tortib, zamonaviy davrgacha bo‘lgan taraqqiyoti, uning bugungi global muammolarni hal etishdagi roli hamda falsafiy tafakkurning ijtimoiy hayotga ta’siri atroflicha muhokama qilindi. Shuningdek, yosh tadqiqotchilar uchun falsafaning dolzarb masalalarini chuqur o‘rganish, xalqaro ilmiy hamkorlikni rivojlantirish va ilmiy izlanishlar samaradorligini oshirish bo‘yicha muhim tavsiyalar berildi.
