2025-yil 9–10-sentabr kunlari Buxoro davlat universitetida “Turizm ta’limi beruvchi oliy ta’lim muassasalari rektorlari III forumi” tashkil etildi. Tadbir O‘zbekiston Respublikasi Prezidentining 2023-yil 26-apreldagi PQ-135-sonli hamda 2024-yil 18-iyuldagi PQ-269-sonli qarorlari ijrosini ta’minlash doirasida hamda universitetimizning 95 yillik yubileyi munosabati bilan o‘tkazildi.
Forumda respublikamizning yetakchi oliy ta’lim muassasalari rahbarlari, professor-o‘qituvchilar, turizm sohasi mutaxassislari hamda xalqaro hamkorlar ishtirok etdilar. Ikki kun davomida forum doirasida quyidagi masalalar muhokama qilindi:
OTMlarda PQ-135 va PQ-269 qarorlari asosida amalga oshirilgan ishlar taqdimoti;
Turizm va mehmondo‘stlik sohasi bitiruvchilarining bandligini ta’minlash tajribalari;
“Turizm universitetlari xalqaro uyushmasi” nizomini ishlab chiqish va faoliyatini yo‘lga qo‘yish masalalari;
Turizm va mehmondo‘stlik sohasida ilmiy hamkorlik yo‘nalishlari;
Xorijiy tillarda kontent yaratish, qisqa muddatli kurslar tashkil etish va talabalar amaliyotini kengaytirish;
Fransiyaning VATEL mehmonxona va turizm biznes maktabi franshizasi asosida ta’lim dasturlarini joriy etish istiqbollari.
Forum yakunida ishtirokchilar xalqaro tajribalarni o‘rganish, turizm ta’limida innovatsion yondashuvlarni qo‘llash, sohada kadrlar tayyorlash sifatini yanada oshirish hamda hamkorlik aloqalarini kengaytirish bo‘yicha muhim kelishuvlarga erishdilar. Mazkur forum Buxoro davlat universitetining 95 yillik shonli tarixida xalqaro hamkorlikni mustahkamlash va turizm ta’limi sohasida yangi bosqichni boshlab beruvchi muhim qadam sifatida e’tirof etildi.
