Buxoro davlat universiteti o‘zining 95 yillik shonli yubileyini keng nishonladi. Ushbu tarixiy sana munosabati bilan universitetda xalqaro ilmiy-amaliy anjumanlar, ko‘rgazmalar, uchrashuvlar va qator madaniy-ma’rifiy tadbirlar bo‘lib o‘tdi.
Tantanalar universitet bosh foyesida tashkil etilgan ko‘rgazma bilan boshlandi. Unda har bir fakultetning yutuqlari, ilmiy izlanishlari va amaliy ishlari namoyish etildi. Mehmonlar ko‘rgazmalar bilan yaqindan tanishib, BuxDUning bugungi salohiyatiga yuksak baho berdilar.
“Jahon sivilizatsiyasida Buxoroning o‘rni: boy meros, barqaror rivojlanish, yorqin kelajak” nomli xalqaro ilmiy-amaliy anjuman ham o‘tkazildi. Tadbir O‘zbekiston Respublikasi Davlat madhiyasining talabalar tomonidan jonli ijro etilishi bilan boshlandi.
Universitet rektori, iqtisodiyot fanlari doktori, professor Obidjon Xamidov tadbirni ochib berar ekan, shunday dedi:
“95 yillik yubiley – bu nafaqat tarixga nazar, balki kelajak oldidagi mas’uliyatni chuqur his etish, yangi marralarni ko‘zlash fursatidir. Bugun biz faxr bilan aytamizki, BuxDU o‘zining o‘tmishi, bugungi yutuqlari va ertangi rejasi bilan ham ilm-fan va taraqqiyotga o‘z hissasini qo‘shmoqda.”
Yubiley tantanalarida Buxoro viloyati hokimi Botir Zaripov ham ishtirok etib, samimiy tabrik so‘zlarini bildirdi. U universitetning yuksak ilmiy salohiyatini ta’kidlab, kelgusida xalqaro maydondagi o‘rnini yanada mustahkamlashiga ishonch bildirdi. Shuningdek, Oliy ta’lim, fan va innovatsiyalar vaziri Kongratbay Sharipovning videomurojaati ham tadbir ishtirokchilariga namoyish etildi.
Yubiley doirasida xorijiy va mahalliy oliygohlar rahbarlari ham ishtirok etdilar. Xazar universiteti asoschisi Hamlet Isaxanli, rektori Raziya Isaeva, Slovakiya texnologiya universiteti rektori Oliver Moravchik, Astraxan davlat universiteti rektori Igor Alekseyev, Don davlat texnika universiteti prorektori Alina Vinitskaya, Tojikiston madaniyat va san’at instituti prorektori Farhod Maxsudzoda hamda boshqa nufuzli mehmonlar BuxDU jamoasini muborakbod etdilar. Ular o‘z tabrik ramzi sifatida universitet rahbariyatiga esdalik sovg‘alari topshirdilar.
Shuningdek, ta’lim va ilm-fan rivojiga salmoqli hissa qo‘shib kelayotgan olimlar, pedagoglar, davlat va jamoat arboblari “Buxoro davlat universitetining 95-yilligi” ko‘krak nishoni bilan taqdirlandilar. Tantanali anjuman yakunida esa universitet tarixida ilk bor BuxDU madhiyasi yoshlar tomonidan ijro etildi. Ushbu ramziy lahza tadbir ishtirokchilariga alohida ruhiy ko‘tarinkilik bag‘ishladi.
