Buxoro davlat universitetida mashhur turkolog olim, jadidlar harakati yetakchisi Fayzulla Xo‘jayevning jiyani — professor Temur Xo‘ja Usmonxo‘ja o‘g‘li bilan uchrashuv bo‘lib o‘tdi.
Tashrif doirasida universitet rektori Obidjon Xamidov, Buxoro pedagogika instituti rektori Bahodir Ma’murov hamda professor-o‘qituvchilar va talabalar bilan samimiy muloqot tashkil etildi. Suhbat davomida BuxDUning 95 yillik tarixi, jadidlar merosi va ilm-fan taraqqiyotidagi ma’naviy-ma’rifiy qadriyatlarni yosh avlodga yetkazish masalalari muhokama qilindi Shuningdek, mehmon va tadbir ishtirokchilari jadidlar harakati yetakchisi, siyosatdon va ma’rifatparvar Fayzulla Xo‘jayev byusti poyiga gul qo‘yib, uning xotirasini yod etdilar. Bu jarayon milliy merosimizga chuqur hurmat va sadoqat ifodasi bo‘ldi.
Professor Temur Xo‘ja Usmonxo‘ja o‘g‘li universitet tuzilmasidagi “Qatag‘on qurbonlari” xotira muzeyida talaba-yoshlar bilan ham uchrashuv o‘tkazdi. U o‘z ma’ruzasida jadidlar harakatining tarixiy ahamiyati, Fayzulla Xo‘jayevning siyosiy-ma’rifiy faoliyati va bugungi avlod uchun qoldirgan saboqlari haqida so‘z yuritdi. Uchrashuv yakunida professor muzeyning “Tashrif kitobi”ga o‘z samimiy tilaklarini yozib qoldirdi.
Mazkur tashrif va uchrashuvlar yoshlarimiz uchun nafaqat tarixiy bilimlarni boyitish, balki milliy o‘zlikni anglash, ma’naviy-ma’rifiy dunyoqarashni kengaytirish va kelajak sari dadil intilish uchun muhim ruhiy kuch manbai bo‘ldi.
