Buxoro davlat universiteti Xorijiy Tilllar fakulteti dekani, f.f.d. (DSc), dotsent N.B. Ataboyev Amerika Qo‘shma Shtatlarining Toshkentdagi elchixonasi (U.S. Embassy in Tashkent) tomonidan to‘liq moliyalashtiriladigan va Xalqaro ta’lim bo‘yicha Amerika kengashi (American Councils for International Education) tomonidan boshqariladigan malaka oshirish kursi — Faculty Enrichment Program (FEP) grantini qo‘lga kiritib, hozirda AQShning Iowa Davlat Universitetida (Iowa State University) faoliyat olib bormoqda.
Ushbu dastur o‘zbekistonlik professor-o‘qituvchilarning pedagogik mahoratini va fan bo‘yicha malakasini oshirish, ikki oliy ta’lim muassasalari o‘rtasida hamkorlikni yo‘lga qo‘yish hamda akademik va ilmiy faoliyat bo‘yicha tajriba almashishni maqsad qilgan bo‘lib, bir semester davomida AQShda amalga oshiriladi.
Grant doirasida mezbon muassasada bir semester davomida barcha xarajatlar, jumladan kasbiy rivojlanish uchun zarur materiallar sotib olish va konferensiyalarda ishtirok etish xarajatlari qoplanadi.
Ma’lumot o‘rnida, AQShning Iowa Davlat Universiteti dunyo reyting agentliklariga ko‘ra yuqori o‘rinlarda qayd etilgan: THE (Times Higher Education) reytingiga ko‘ra 351–400 oralig‘ida, QS reytingida esa 2025-yil natijalariga ko‘ra #470 o‘rinda turadi.
Hozirda N.B. Ataboyev Iowa Davlat Universitetining Ingliz tili kafedrasida faoliyat olib borib, kafedra va fakultet rahbariyati tomonidan jamoaga tanishtirildi va kutib olindi. Shuningdek, u biriktirilgan kafedra professorlari bilan birgalikda akademik o‘quv yili boshida bir nechta workshoplarda faol ishtirok etmoqda.
