O‘zbekiston Respublikasi Prezidenti Shavkat Mirziyoyevning Turkmanistonga amalga oshirgan amaliy tashrifi hamda Turkman xalqining milliy yetakchisi, Turkmaniston xalq maslahati raisi Gurbanguli Berdimuhamedov va Ozarbayjon Respublikasi Prezidenti Ilhom Aliyev bilan o‘tkazgan uchrashuvlari mamlakatimiz tashqi siyosati tarixida muhim ahamiyat kasb etadi.
Davlatimiz rahbarining Turkmanboshi shahrida o‘tgan uchrashuvlarda ishtiroki, “Ozarbayjon – Turkmaniston – O‘zbekiston” formatidagi uch tomonlama sammit doirasida olib borilgan muzokaralar, qabul qilingan qo‘shma bayonot hamda imzolangan hujjatlar nafaqat davlatlarimiz o‘rtasidagi do‘stlik va birodarlik rishtalarini mustahkamlash, balki butun mintaqada barqarorlik, taraqqiyot va hamkorlikni yangi bosqichga ko‘tarishga xizmat qiladi.
Ushbu tashrif doirasida iqtisodiyot, transport, energetika, savdo, ilm-fan va madaniyat sohalarida hamkorlikni kengaytirishga qaratilgan muhim kelishuvlarning imzolanishi, albatta, kelajak avlodlar uchun ulkan imkoniyatlar yaratadi. Prezidentimizning tashqi siyosatda qo‘lga kiritayotgan yutuqlari O‘zbekistonning xalqaro maydondagi nufuzini yanada oshirib, mamlakatimizning mintaqaviy va global jarayonlardagi ishonchli hamkor sifatidagi mavqeini mustahkamlamoqda.
Buxoro davlat universiteti jamoasi ushbu tarixiy tashrifni katta ehtirom va g‘urur bilan qabul qilmoqda. Zero, Prezidentimiz tomonidan amalga oshirilayotgan tashqi siyosiy faoliyat ta’lim va ilm-fan sohalarida ham keng imkoniyatlar eshigini ochmoqda. Biz, o‘z navbatida, qardosh Turkmaniston va Ozarbayjon oliy ta’lim muassasalari bilan qo‘shma loyihalarni yo‘lga qo‘yish, ilmiy-tadqiqotlar va professor-o‘qituvchilar hamda talabalar almashinuvini kengaytirish orqali davlatlarimiz o‘rtasidagi hamkorlikni yanada rivojlantirishga intilamiz.
Shuni alohida ta’kidlash joizki, Buxoro davlat universiteti xalqaro hamkorlik aloqalarini kengaytirishga alohida e’tibor qaratmoqda. Universitetimiz bugungi kunda dunyoning ko‘plab nufuzli ilmiy va ta’lim muassasalari bilan faol hamkorlik qilib kelmoqda. Prezidentimiz tashriflari davomida imzolangan hujjatlar va kelishuvlar biz uchun ham yangi istiqbollarni ochib beradi.
Biz, Buxoro davlat universiteti jamoasi, davlatimiz rahbarining xalqaro miqyosdagi tashabbuslarini qo‘llab-quvvatlab, ta’lim, fan va innovatsiyalar orqali O‘zbekistonning taraqqiyotiga munosib hissa qo‘shishda davom etamiz.
Obidjon Xamidov
Buxoro davlat universiteti rektori, iqtisodiyot fanlari doktori, professor
