Mamlakatimizda amalga oshirilayotgan keng ko‘lamli islohotlar, xalqimizning ertangi kuniga bo‘lgan ishonchini mustahkamlash yo‘lida ta’lim va tarbiya tizimiga alohida e’tibor qaratilmoqda. Bu borada davlatimiz rahbari tomonidan bildirilayotgan fikr va tashabbuslar biz – Buxoro davlat universiteti jamoasi uchun ham yo‘l-yo‘riq, dasturilamal bo‘lib xizmat qiladi.
O‘zbekiston Respublikasi Prezidenti Shavkat Mirziyoyevning tadbirkorlar bilan ochiq muloqot shaklida o‘tkazilgan uchrashuvdagi nutqi butun jamoatchilik uchun ulkan ahamiyatga ega bo‘lib, barcha sohalardagi islohotlarni yanada chuqurlashtirishga da’vat etdi. Ushbu nutqda davlatimiz rahbari ta’lim, tarbiya, ilm-fan va tadbirkorlikka oid muhim masalalarga to‘xtalib, ularni amalga oshirishda barcha qatlam vakillarining mas’uliyatini alohida ta’kidladi.
Shu bois Buxoro davlat universiteti jamoasi sifatida biz Prezidentimiz tomonidan ilgari surilgan vazifalarni o‘z faoliyatimizda asosiy yo‘nalish sifatida qabul qilamiz. Prezidentimizning “yoshlar qalbida yurtga sadoqat, bilimga chanqoqlik va fidoyilik tuyg‘ularini shakllantirish” haqidagi g‘oyalari bizning barcha ishlarimizning ma’naviy mezoniga aylanadi.
Universitetimizda hozirda 20 mingdan ziyod talabalar tahsil olmoqda. Ularning bilim olishi, ijodiy qobiliyatlarini rivojlantirishi, ilmiy tadqiqotlar bilan shug‘ullanishi uchun zarur sharoitlar yaratilgan. Prezidentimiz nutqida qayd etilganidek, ta’lim jarayoniga zamonaviy pedagogik texnologiyalarni tatbiq etish, fan va ishlab chiqarish integratsiyasini kuchaytirish, xorijiy hamkorlikni kengaytirish biz uchun ustuvor vazifa bo‘lib qoladi.
Shuningdek, yoshlarning milliy va umuminsoniy qadriyatlarga sodiqligini oshirish, ularda sog‘lom turmush tarzini qaror toptirish, kitobxonlik madaniyatini rivojlantirish bo‘yicha ham keng ko‘lamli ishlarni amalga oshirmoqdamiz. Bu borada Prezidentimizning nutqida ilgari surilgan fikrlar bizning faoliyatimizni yangi bosqichga ko‘taradi. Albatta, bu vazifalarni amalga oshirishda professor-o‘qituvchilarimizning mas’uliyati yanada ortadi. Har bir ustoz o‘z oldiga faqat bilim berish emas, balki yoshlar qalbida Vatanga sadoqat, mustaqillik g‘oyalariga e’tiqod, yangilikka intilish tuyg‘ularini uyg‘otishni maqsad qilib qo‘yishi lozim.
Bugungi kunda BuxDU jamoasi ilmiy izlanishlarni yanada chuqurlashtirish, innovatsion loyihalarni amalga oshirish, talabalarning amaliy ko‘nikmalarini mustahkamlash hamda ularning bandligini ta’minlash borasida ham keng qamrovli ishlarni olib bormoqda.
Shuni alohida ta’kidlash joizki, Prezidentimizning nutqi bizga kuch, g‘ayrat va ilhom bag‘ishladi. Davlatimiz rahbarining ishonchi va yuksak e’tiboriga javoban Buxoro davlat universiteti jamoasi barcha bilim va salohiyatini safarbar etib, mamlakatimiz taraqqiyoti, xalqimiz farovonligi va yoshlarimizning porloq kelajagi uchun sidqidildan xizmat qilishga tayyor.
Obidjon Xamidov
Buxoro davlat universiteti rektori, iqtisodiyot fanlari doktori, professor
