Bugun Buxoro davlat universitetida Ijtimoiy himoya milliy agentligi Buxoro viloyati boshqarmasi rahbariyati va Buxoro davlat universiteti rahbariyati o'rtasida uchrashuv tashkil etildi.
Uchrashuvda Ijtimoiy himoya milliy agentligi Buxoro viloyati boshqarmasi boshlig‘i Umidjon Umarov, universitet rektori Obidjon Xamidov boshchiligidagi universitet, Tarix va yuridik fakulteti jamoasi, professor-o'qituvchilar, “Ijtimoiy ish” va “Psixologiya” yo‘nalishlari bitiruvchi talabalari ishtirok etishdi.
Uchrashuvni universitet rektori Obidjon Xamidov ochib berib, mamlakatimizda ijtimoiy sohani rivojlantirish yo‘nalishida olib borilayotgan islohotlarga to‘xtaldi. Shundan so‘ng, Ijtimoiy himoya milliy agentligi Buxoro viloyati boshqarmasi boshlig‘i Umidjon Umarov so‘zga chiqib, agentlik Prezident qarori bilan 2023-yilda tashkil etilganligini, aholiga professional ijtimoiy xizmat va yordam ko‘rsatish, og‘ir hayotiy vaziyatga tushgan fuqarolarni qo‘llab-quvvatlash, nogironligi bo‘lgan shaxslar, ayollar, bolalar, keksalar va yoshlarga kompleks yordam berish, oilalarni muhofaza qilish, ijtimoiy sug‘urta tizimini rivojlantirish, xizmatlarni mahalla darajasida manzilli va shaffof tashkil etish, jamiyatda inklyuzivlik va ijtimoiy moslashuvni ta’minlash masalalari bo'yicha malumotlar berib o'tdi. Shu bilan birga, BuxDU bitiruvchilari uchun ishga joylashishda ustuvor imkoniyatlar mavjudligini qayd etdi.
Uchrashuv davomida talabalar va bitiruvchilar o‘zlarini qiziqtirgan savollar bilan murojaat qilishdi. Jumladan, “Ijtimoiy ish” yo‘nalishi bitiruvchisi Anorabonu Usmonova ishga joylashish jarayoni, suhbat savollari va lavozim yo'riqnomalari haqida so‘radi.
Agentlik vakillari tomonidan quyidagilar ma’lum qilindi:
Suhbat savollari argos.uz hamda ihma.uz saytlarida e’lon qilingan, 250 ta savol to‘plami mavjud.
Uchrashuv so'ngida Buxoro davlat universiteti hamda Ijtimoiy himoya milliy agentligi Buxoro viloyati boshqarmasi o'rtasida hamkorlik memorandumi imzolandi.
Ushbu hamkorlik memorandumi BuxDU bitiruvchilarining Ijtimoiy himoya milliy agentligida ishga joylashishiga, amaliy ko‘nikmalarini mustahkamlashga, ijtimoiy sohada innovatsion tashabbuslarni qo‘llab-quvvatlash va yangi hamkorlik loyihalarini amalga oshirishga xizmat qiladi.
