Fransiyalik professorlar Buxoro davlat universitetiga tashrif buyurdi
18.08.2025
Ayni kunlarda shahrimizda mehmon bo‘lib turgan Tuluza Capitol universiteti professori Laurent Grosclaude hamda Tuluza Paul Sabatier universiteti professori Dumas Buxoro davlat universitetiga tashrif buyurib, BuxDU rektori Obidjon Xamidov bilan uchrashuv o‘tkazdilar.
Mazkur uchrashuv universitet rektorining joriy yil iyun oyida Fransiyaga qilgan xizmat safarining mantiqiy davomi bo‘ldi. Suhbat davomida hamkorlikning bir qator amaliy yo‘nalishlari yuzasidan muhim kelishuvlarga erishildi.
- 2025–2026-o‘quv yilida ayrim ta’lim yo‘nalishlari, jumladan yurisprudensiya talabalarining Tuluza Capitol universitetiga tanishuv safari tashkillashtirilishi;
- Tuluza Capitol universiteti bilan 2026–2027-o‘quv yilidan boshlab xalqaro tijorat huquqi bo‘yicha magistratura yo‘nalishini yo‘lga qo‘yish;
- Tuluza Paul Sabatier universiteti laboratoriya majmualarining rahbari professor Dumas tomonidan ilmiy laboratoriyalar faoliyati taqdimoti o‘tkazilishi va BuxDU ilmiy tadqiqotchilari uchun ushbu laboratoriyalarda bepul ilmiy-tadqiqot ishlari olib borish imkoniyati yaratilishi masalalari kelishib olindi.
Bu uchrashuv Buxoro davlat universitetining xalqaro hamkorlik aloqalarini kengaytirish va ilm-fan sohasidagi integratsiyani chuqurlashtirish yo‘lidagi navbatdagi muhim qadamlardan biri bo‘ldi.
