2025-yil 12–13-avgust kunlari Buxoro davlat universitetiga Germaniyaning nufuzli ACQUIN — Akkreditatsiya, sertifikatlash va sifat kafolati instituti ekspertlari tashrif buyurdi. Tashrif doirasida universitetdagi ta’lim sifati, ichki baholash tizimi hamda xalqaro standartlarga muvofiqlik darajasi baholanmoqda.
Jarayon universitet rektorati, fakultet dekanlari, bo‘lim boshliqlari, kafedra mudirlari va talabalar bilan o‘tkazilgan suhbatlar orqali olib borildi. Suhbatlarda akkreditatsiya jarayonining muhim jihatlari — o‘z-o‘zini baholash hisobotini (SAR) tayyorlash, o‘quv dasturlarini xalqaro talablarga moslashtirish hamda sifat kafolati tizimini takomillashtirish masalalari muhokama qilindi.
Shuningdek, uchrashuv doirasida Ta’lim sifatini nazorat qilish departamenti boshlig‘i Ziyodulla Nurov hamrohligidagi ACQUIN ekspertlari delegatsiyasi universitetning zamonaviy IT markazi, ilg‘or robototexnika markazi va yuqori texnologiyalar bilan jihozlangan kimyo laboratoriyasida bo‘lib, ularning faoliyati bilan yaqindan tanishdi.
Mazkur xalqaro akkreditatsiya jarayoni Buxoro davlat universitetining xalqaro miqyosdagi raqobatbardoshligini oshirish, ta’lim sifatini yanada yuksaltirish va global ta’lim makonida o‘z o‘rnini mustahkamlashga xizmat qiladi.
