“Dolzarb 90 kun” loyihasi doirasida yoshlar o‘rtasida ijtimoiy faollikni oshirish, hamkorlik va o‘zaro tajriba almashuvini mustahkamlash maqsadida Andijon texnika universitetining 30 nafarga yaqin iqtidorli va faol talabalari Buxoro davlat universitetida mehmon bo‘lishdi.
Mazkur tashrif davomida mehmon talabalar BuxDUda yaratilgan zamonaviy ta’lim va innovatsion sharoitlar, talabalarning bo‘sh vaqtini mazmunli o‘tkazish uchun yaratilgan infratuzilmalar, xususan, robototexnika markazi, office registrator, universitetdagi muzey faoliyati bilan yaqindan tanishdilar. Shuningdek, ular Buxoro yoshlari bilan birgalikda “Zakovat” intellektual bellashuvi va boshqa do‘stona musobaqalarda ishtirok etib, ilm-fan va tafakkur maydonida o‘z bilimlarini sinovdan o‘tkazdilar.
Tashrif doirasida talabalarga “Vatan bo‘ylab sayohat qil” loyihasi asosida Buxoroning tarixiy obidalari, madaniy merosi va zamonaviy taraqqiyot maskanlariga ekskursiyalar tashkil etildi. Ikki kunlik tashrif davomida mehmon talabalar universitetning talabalar turar joyida istiqomat qilib, bu yerda olib borilayotgan talabalar hayoti bilan bevosita tanishish imkoniga ega bo‘ldilar. Mazkur tashrif nafaqat bilim va madaniyat almashinuvi, balki ikki oliy ta’lim muassasasi o‘rtasidagi do‘stona aloqalarni mustahkamlash, yoshlar orasida o‘zaro hurmat, birdamlik va hamkorlik ruhini oshirishga xizmat qildi.
