2025-yil 24–26-iyun kunlari Rossiyaning Murmansk shahrida bo‘lib o‘tgan xalqaro robototexnika olimpiadasida O‘zbekiston vakillari ilk bor ishtirok etib, nufuzli sovrinlarga sazovor bo‘lishdi.
Buxoro davlat universiteti talabalari va ilmiy izlanuvchilari ushbu nufuzli musobaqada munosib ishtirok etib, bir qator yo‘nalishlarda faxrli o‘rinlarni qo‘lga kiritishdi. Jumladan:
Safarov Rustambek Sunnatillo o‘g‘li – Elektronika va asbobsozlik yo‘nalishi, 1-1ELEK-23-guruh talabasi:
“Bo‘lajak muhandislar” yo‘nalishida Butunrossiya sport dasturlash bo‘yicha musobaqada 1-o‘rinni, milliy final bosqichida esa 3-o‘rinni egalladi.
Kamolov Kamronbek Qobilovich – Matematika yo‘nalishi, 1-3MAT-24-guruh talabasi:
Xuddi shu yo‘nalishda 2-o‘rin sohibi bo‘ldi.
Ergashev Navruz Xakimovich – BuxDU Amaliy matematika va dasturlar texnologiyalari kafedrasi tadqiqotchisi:
“Bo‘lajak muhandislar” musobaqasida 3-o‘rinni qo‘lga kiritdi.
Ayniqsa, Ergashev Navruz Xakimovichning ushbu olimpiadadagi faoliyati e’tiborga molik bo‘ldi – u musobaqaning rasmiy hakamlaridan biri sifatida qatnashib, Rossiya robototexnika federatsiyasi tomonidan rasman hakamlik malakasi bilan taqdirlandi. Shuningdek, unga “Bosh hakamlik uchun minnatdorchilik maktubi” topshirildi.
Buxoro davlat universiteti jamoasi nomidan xalqaro miqyosda yurtimiz nomini munosib himoya qilgan barcha ishtirokchilarni, ularning ustozlari va ota-onalarini samimiy muborakbod etamiz.
Zamon bilan hamnafas, innovatsiyalar bilan qurollangan yoshlarimizni yuksak yutuqlari bilan chin dildan qutlaymiz va ularga kelgusidagi izlanishlarida ulkan muvaffaqiyatlar tilaymiz!
