Buxoro davlat universitetida “Yangi O‘zbekiston yoshlari, birlashaylik” shiori ostida o‘tkazilgan “BuxDUda dolzarb bir kun” yoshlar festivali yuqori saviyada tashkil etildi. Festival mamlakatimiz Prezidenti Shavkat Mirziyoyev tomonidan ilgari surilgan “Dolzarb 90 kunlik” tashabbuslari doirasida yoshlarning bo‘sh vaqtini mazmunli tashkil etish, ularni ilm, ijod, sport va kasb-hunar yo‘nalishlarida rag‘batlantirish maqsadida o‘tkazildi.
Velomarafondan – ziyoratgacha
Festival doirasidagi muhim tadbirlardan biri sifatida BuxDU rektori boshchiligida oliy ta'lim muassasalari vakillari, professor-o‘qituvchilar va talabalar ishtirokida an’anaviy “Ziyorat Velomarafoni” tashkil etildi. Unda ishtirokchilar qadimiy Chor-Bakr yodgorlik majmuasiga tashrif buyurib, tarixiy-me’moriy meros bilan yaqindan tanishdilar.
Yoshlar huquqiy sayli: bilim va ko‘nikmalar uyg‘unligi
Yoshlar festivalining yana bir e’tiborga molik jihati – huquqiy ongni oshirishga xizmat qiluvchi “Yoshlar huquqiy sayli” bo‘ldi. Viloyat adliya boshqarmasi va boshqa huquqni muhofaza qiluvchi organlar tomonidan 10 ga yaqin tashkilot maxsus texnik vositalar va jihozlar taqdimotini o‘tkazdi. Yoshlar Milliy gvardiya, FVV, Yong‘in xavfsizligi xizmati kabi tuzilmalar faoliyati bilan yaqindan tanishish imkoniga ega bo‘lishdi.
Bandlik va kasbga yo‘naltirish – amaliy qadamlar bilan
Festival doirasida “Yoshlar karyerasi va bandligi” ko‘rgazmasi ham tashkil etildi. Ko‘rgazmada bir nechta tashkilot va ish beruvchilar – sog‘liqni saqlash tizimi, maktabgacha va maktab ta’limi bo‘limlari, xususiy sektor vakillari (Aziz Textile MChJ, Chase Sun Energy MChJ va boshqalar) ishtirok etib, yoshlarga mavjud ish o‘rinlari va stajirovka imkoniyatlarini taqdim etdi.
Ilm-fan va ijodiy muhit uyg‘unlashgan maydon
“Ochiq eshiklar kuni” doirasida fakultetlar va ilmiy laboratoriyalar faoliyati namoyish etildi. Jumladan, Kimyo va neft-gaz texnologiyalari kafedrasida “Dorishunoslik”, “Qiziqarli kimyo” va “Neft-gaz kimyosi asoslari” to‘garaklari qiziqarli tajribalar bilan tanishtirildi. Biotexnologiya va oziq-ovqat kafedrasida esa “Yosh baliqchi” va “Algalogiya va mikologiya” kabi to‘garaklar faoliyati taqdim etildi.
Madaniyat va san’at – yoshlar qalbi uchun ilhom manbai
Festival doirasida “Buxoroga sayohat” komediyasi premyerasi bo‘lib o‘tdi. Taniqli dramaturg Laziz Navro‘zov asari asosida sahnalashtirilgan spektakl viloyat musiqali drama teatri tomonidan namoyish etildi. Shuningdek, yoshlar uchun 90 daqiqa davomida milliy kinematografiya namunalari – xususan “Islomxo‘ja” badiiy-tarixiy filmi ko‘rsatildi.
Sport – sog‘lom turmush tarzining kafolati
Festival davomida universitet sport zallarida futbol, kurash, boks, voleybol, basketbol kabi sport turlarida ko‘rgazmali musobaqalar o‘tkazildi. Jismoniy tarbiya va sport fakulteti tomonidan tashkil etilgan sport to‘garaklari faoliyati bilan ham yoshlar tanishtirildi.
Kitobxonlik – ma’naviy yuksalish poydevori
Universitet axborot-resurs markazida “BuxDUda yozgi ta’til yosh kitobxonlar bilan birga o‘tadi” aksiyasi o‘tkazildi. Shahardagi barcha maktab o‘quvchilari ushbu tadbirda ko‘ngilli ravishda ishtirok etishdi.
Rektor ishtirokidagi “Yoshlar ilmiy-innovatsion rivojlanadi” mavzusida tadbir
Tadbir universitet rektori Obidjon Xamidov tomonidan ochib berildi. U o‘z nutqida BuxDUda yoshlarga yaratilayotgan sharoitlar – bepul to‘garaklar, chet tillarini o‘rganish imkoniyatlari, sun’iy intellekt, robototexnika, IT va boshqa zamonaviy fanlar bo‘yicha berilayotgan ta’lim haqida ma’lumot berdi.
Festival yakunida – yoshlar fikrlari e’tiborda
Tadbir ishtirokchilari o‘z taassurotlari bilan o‘rtoqlashar ekan, festival ularda katta taassurot qoldirganini aytishdi. Yosh ishtirokchilardan biri quyidagi fikrni bildirdi:
– ““Yangi O‘zbekiston yoshlari, birlashaylik” shiori ostida tashkil etilgan tadbirda faol ishtirok etib kelmoqdaman. Hozirda bu yerda kamondan o‘q otish san’ati bo‘yicha yaxshiroq bilimlarni egallashga harakat qilyapman. Kelajakda bu sport turini chuqur o‘rganib, yutuqlarga erishmoqchiman. Shu bilan birga, konsertlar, kinolar va Milliy gvardiya chiqishlari biz yoshlar uchun katta taassurot qoldirdi.”
