Buxoro davlat universiteti rektori Obidjon Xamidovning Fransiyaga rasmiy tashrifi doirasida Tuluza shahar hokimiyatida muhim uchrashuvlar bo‘lib o‘tdi. Jumladan, u Tuluza shahar hokimi o‘rinbosari va Toulouse Métropole vitse-prezidenti janob Maksim Boyer bilan muzokaralar olib bordi.
Ma’lumot uchun, Maxime Boyer bir necha bor O‘zbekistonni tashrif buyurgan, xalqaro investitsiya forumlari, konferensiyalar va turli tadbirlarda faol ishtirok etgan. U, shuningdek, mamlakatimizdagi intellektual markazlar bilan yaqin hamkorlikda ishlaydi va ta’lim sohasidagi aloqalarni rivojlantirishga katta e’tibor qaratadi.
Tuluza shahar hokimiyatining tarixiy Kapitol maydonida o‘tkazilgan uchrashuvda ta’lim sohasiga mas’ul shaxslar ishtirok etdi. Suhbat davomida Buxoro davlat universiteti va Tuluza universitetlari o‘rtasidagi ilmiy-akademik hamkorlikni yanada kengaytirish masalalari muhokama qilindi. Tomonlar kelgusida quyidagi yo‘nalishlarda qo‘shma faoliyat olib borishga kelishib oldilar:
Sun’iy intellekt, xalqaro biznes, yurisprudensiya va xalqaro huquq sohalarida qo‘shma ta’lim dasturlarini yo‘lga qo‘yish;
Tashabbuskor hududlar muammolarini ilmiy o‘rganishga qaratilgan loyihalarni amalga oshirish;
College of Law va College of Economics kabi muassasalar bilan professor-o‘qituvchilar va talabalar almashuvini tashkil qilish.
Shuningdek, Obidjon Xamidov Toulouse School of Economics vakillari, xususan, professor François Poinas bilan ham alohida uchrashuv o‘tkazdi. Muloqot davomida ikki oliy ta’lim muassasasi o‘rtasidagi hamkorlik yo‘nalishlari belgilab olindi. Jumladan:
Talabalar va o‘qituvchilar uchun 2-3 haftalik tajriba almashuv dasturlarini tashkil etish;
Iqtisodiyotning turli tarmoqlari uchun zamonaviy mutaxassislar tayyorlashga qaratilgan qo‘shma ta’lim loyihalarini ishlab chiqish bo‘yicha kelishuvga erishildi.
Mazkur tashrif ikki mamlakat o‘rtasidagi ta’lim aloqalarini mustahkamlash, zamonaviy bilim va innovatsiyalar almashinuvini yo‘lga qo‘yish yo‘lidagi muhim qadam bo‘ldi.
