23-iyun kuni, Buxoro davlat universiteti "Universal" sport majmuasida "Dolzarb 90 kun" doirasida AOKA Buxoro viloyat hududiy boshqarmasi, Buxoro davlat universiteti hamda O‘zbekiston Jurnalistlar uyushmasi Buxoro viloyat bo‘limi bilan hamkorligida ommaviy axborot vositalari ishtirokida “Buxoro davlat universitetida 2025-2026 o‘quv yili qabuli hamda alohida iqtidor talab etadigan sport ta’lim yo‘nalishlari bo‘yicha kasbiy ijodiy imtihonlarni o‘tkazish” mavzusida matbuot anjumani o'tkazildi.
Tadbirda yoshlarga universitetda o‘qishning afzalliklari, qabul jarayonlarida abituriyentlar uchun yaratilgan imkoniyatlar haqida bitiruvchilarni xabardor qilish maqsadida “Ochiq eshiklar kuni” ham tashkil etildi. Majmua foyesida Jismoniy tarbiya va sport fakulteti sportchi talaba yoshlari hamda professor-o'qituvchilari erishgan yutuqlari aks etgan ko'rgazma namoyish etildi. Shuningdek, Buxoro davlat universitetidagi ta'lim yo'nalishlari haqida ma'lumot berildi.
BuxDU Axborot xizmati bo'limi tomonidan tashkil etilgan matbuot anjumanida Buxoro davlat universiteti Yoshlar masalalari va ma’naviy-ma’rifiy ishlar bo‘yicha birinchi prorektori D.Yavmutov, Rektor ijro apparati boshlig'i B.Adizov, O‘quv uslubiy departament boshlig‘i S.S.Davlatov, universitet Axborot xizmati bo‘limi boshlig‘i Otabek Jalolov, bo‘lim boshliqlari, Jismoniy tarbiya va sport fakulteti dekani A.Sh.Inoyatov, fakultet kafedra mudirlari, bir qator jurnalist va blogerlar, jumladan, "Uza", "Istiqlol TV", "Потребитель Бухара плюс", "xabar.uz", "Buxoro yoshlari", "Bukharabest", "Tezkor yangiliklar", "Yoshlar TV", "Ochun.uz", "World7.uz", "Yangi O'zbekiston", "Sevimli TV", "Buxoro TV" kabi OAV vakillari ishtirok etdilar.
Matbuot anjumani avvalida Yoshlar masalalari va ma’naviy-ma’rifiy ishlar bo‘yicha birinchi prorektori D.Yavmutov so‘zga chiqib, matbuot anjumanini ochib berdi. U nutqi davomida Buxoro davlat universitetida 2025-2026 o‘quv yili qabuli hamda alohida iqtidor talab etadigan sport ta’lim yo‘nalishlari bo‘yicha kasbiy ijodiy imtihonlarni o‘tkazish, BuxDUda amalga oshirilayotgan ishlar, oliygohning ilmiy salohiyati, kafedralar faoliyati, olinayotgan natijalar hamda kelgusidagi vazifalar haqida umumiy ma’lumot berdi. Shuningdek, BuxDUning xalqaro doiradagi o'rni Times Higher Education (THE) agentligining "Impact Rankings 2025" reytingi, UNWTO TedQual xalqaro akkreditatsiyasi, ACQUIN xalqaro akkreditatsiyasi, UI GreenMetric World University Rankings 2024 kabi reytinglardagi natijasi misolida aytib o'tildi.
Matbuot anjumani doirasida O‘zbekiston Jurnalistlar uyushmasi Buxoro viloyat bo‘limi va Buxoro davlat universiteti o'rtasida hamkorlik aloqalarini yanada rivojlantirish bo'yicha hamkorlik memorandumi imzolandi.
27-iyun — Matbuot va ommaviy axborot vositalari xodimlari kuni munosabati bilan hamda Buxoro davlat universiteti bilan xalqaro, ilmiy, ijtimoiy, madaniy, san'at, sport, yoshlar, axborot texnologiyalari va raqamli taraqqiyot kabi yo’nalishlar targ’ibotida faol ishtirok etganligi hamda tashrif buyurganligi munosabati bilan bir qator hamkor OAV, bloger va jurnalistlar BuxDU rahbariyati va Axborot xizmati bo'limi tomonidan tashakkurnoma va esdalik uchun sovg'alar bilan taqdirlandi.
