Fransiyaning Vatel GROUP bosh direktori Karine Sebban-Benzazon, Vatel xalqaro tarmog‘i direktori Janob Paul D’Azémar, shuningdek, xalqaro rivojlanish bo‘limi menedjeri Aline Renard-Wang bilan bo‘lib o‘tgan uchrashuvda VATEL modelining O‘zbekistonda, xususan, Buxoro davlat universiteti negizida joriy etilishi, mehmonxona va restoran biznesi uchun dual ta’lim tizimini rivojlantirish istiqbollari muhokama qilindi.
Uchrashuv davomida Buxoro davlat universiteti hamda Buxoro shahridagi yetakchi mehmonxonalar o‘rtasida amaliy hamkorlikka asoslangan dual ta’lim tizimini joriy etish, mehmondo‘stlik va turizm yo‘nalishlarida zamonaviy, amaliyotga yo‘naltirilgan o‘quv dasturlarini ishlab chiqish, shuningdek, universitet va mehmonxona sanoati vakillari o‘rtasida regional ta’lim-klasterini shakllantirish masalalari bo‘yicha fikr almashildi.
Tashrif doirasida Obidjon Xamidov Fransiyaning Lion shahrida joylashgan VATEL mehmonxona va turizm biznes maktabining 2-kurs talabalari uchun ingliz tilida "O‘zbekistonda enoturizm imkoniyatlari" mavzusida master-klass ham o‘tkazdi. Mazkur dars davomida talabalarga O‘zbekistonda enoturizmning istiqbollari, mamlakatda turizm infratuzilmasining rivojlanishi hamda tajriba almashish bo‘yicha imkoniyatlar haqida atroflicha ma’lumot berildi. Shuningdek, Marco Polo dasturi doirasida amalga oshirilayotgan xalqaro almashinuv loyihalari haqida ham fikr almashildi.
Mazkur tashrif BuxDUning xalqaro hamkorlik yo‘nalishida olib borayotgan izchil va natijador faoliyatining yana bir amaliy ifodasi bo‘lib, universitetda mehmondo‘stlik va turizm sohalarida sifatli, amaliy bilimlarga asoslangan yangi ta’lim dasturlarini shakllantirishga xizmat qiladi.
