Buxoro shahridagi markaziy favvoralar maydonida “Dolzarb 90 kun” loyihasi doirasida yoshlar uchun katta madaniy-ma’rifiy tadbir — Buxoro davlat universiteti San’atshunoslik va pedagogika fakultetining iqtidorli talabalari hamda Milliy cholg‘ular ansamblining hisobot konsert dasturi bo‘lib o‘tdi. Tadbirni tashkil etishdan ko‘zlangan asosiy maqsad — yosh avlodni milliy qadriyatlar, san’at va musiqa orqali ma’naviy yuksaltirish, ularning estetik didini shakllantirish, iste’dodli talabalarni keng jamoatchilikka tanitishdan iborat bo‘ldi.
Konsert dasturida Buxoro davlat universiteti rektori, professor Obidjon Xamidov, Buxoro davlat tibbiyot instituti rektori Shuhrat Teshayev, universitet va institutning professor-o‘qituvchilari, talaba-yoshlar hamda mahalliy aholi vakillari ishtirok etdilar.
Tadbirda BuxDU San’atshunoslik va pedagogika fakultetining iqtidorli talabalari o‘zlarining kuy-qo‘shiqlari va raqslari orqali tomoshabinlarda katta taassurot qoldirdilar. Ayniqsa, Behruz Boltayev rahbarligidagi Milliy cholg‘ular ansambli tomonidan ijro etilgan asarlar xalqimizning boy musiqa merosini namoyon etib, barchaga unutilmas lahzalarni taqdim etdi. Turli milliy asboblar — dutor, rubob, gijjak sadosida yangragan kuylar tomoshabinlar tomonidan qarsaklar bilan kutib olindi.
Tadbir yakunida Milliy cholg‘ular ansambli a’zolari va iqtidorli talabalar universitet hayotidagi ma’naviy-ma’rifiy ishlar, san’atni rivojlantirishdagi faol ishtiroklari uchun munosib tarzda taqdirlandilar.
Mazkur konsert dasturi yoshlar orasida milliy san’atga bo‘lgan qiziqishni yanada oshirish, ijodiy faoliyatga rag‘batlantirish, ularni sog‘lom va har tomonlama yetuk insonlar etib tarbiyalashda muhim ahamiyat kasb etdi.
