Oliy ta’lim, fan va innovatsiyalar vaziri maslahatchisi A.Rizayev Buxoro davlat universiteti faoliyati bilan yaqindan tanishdi.
12-iyun kuni Oliy ta’lim, fan va innovatsiyalar vaziri maslahatchisi A. Rizayev Buxoro davlat universitetiga tashrif buyurdi. Tashrifdan ko‘zlangan asosiy maqsad – universitet faoliyati, yaratilgan shart-sharoitlar, yoshlar bilan ishlash jarayonlari va ta’lim sifatini bevosita o‘rganishdan iborat bo‘ldi.
Dastlab, A. Rizayev universitetning Universal sport majmuasiga tashrif buyurdi va u yerda “Dolzarb 90 kun” loyihasi doirasida yoshlarning bo‘sh vaqtlarini mazmunli o‘tkazish uchun yaratilgan imkoniyatlar bilan tanishdi. Sport zali, ochiq maydonlar va boshqa infratuzilmalarning holati, ularning talabalarning jismoniy va ruhiy salomatligiga qo‘shayotgan hissasi muhokama qilindi.
Tashrif davomida maslahatchi BuxDU axborot-resurs markazida, jumladan, ochiq osmon ostidagi muzeyda bo‘lib, talaba va tadqiqotchilar uchun yaratilgan imkoniyatlarni ko‘zdan kechirdi. Bu yerda ilmiy-innovatsion faoliyat uchun yaratilgan sharoitlar, kitob fondi, elektron resurslardan foydalanish imkoniyatlari va talabalar uchun yaratilgan qulayliklar e’tiborni tortdi.
Shuningdek, A. Rizayev universitet talabalar turar joylariga ham alohida e’tibor qaratildi. U yerda yashash sharoitlari, tozalik, xavfsizlik va bo‘sh vaqtni mazmunli tashkil etish borasida olib borilayotgan ishlar bilan tanishildi. Universitet profilaktika inspektorlari va psixologi bilan o‘tkazilgan suhbatlarda esa talabalar bilan olib borilayotgan psixologik treninglar, ularning ijtimoiy moslashuvi, stressga qarshi kurashish bo‘yicha ko‘rsatilayotgan yordamlar muhokama qilindi.
Umuman olganda, A. Rizayevning Buxoro davlat universitetiga tashrifi davomida oliy ta’lim tizimini yanada takomillashtirish, talabalar uchun sog‘lom va zamonaviy ta’lim muhiti yaratish bo‘yicha bir qator amaliy taklif va tavsiyalar berildi. Bu tashrif universitet faoliyatini yanada faollashtirishga xizmat qilishi kutilmoqda.
