Buxoro davlat universitetida Har bir tuman hokimi hamda o’sha hudud talaba-yoshlari bilan “Hokim va yoshlar” uchrashuvlari samarali davom etmoqda. Bugun, 4-iyun kuni, Qorako'l tuman hokimi Xurshid Toxirov bilan qorako'llik talaba-yoshlar hamda bitiruvchilar bilan uchrashuv tashkil etildi. "Hokim va yoshlar uchrashuvi" davomida "Dolzarb 90 kun" doirasida BuxDU bitiruvchi kurs talabalari ishtirokida “Kelajakka qadam” shiori ostida yirik tadbirkorlar bilan biznes trening o‘tkazildi. Uchrashuvda BuxDU rektori Obidjon Xamidov boshchiligidagi rahbariyat, pedagog-xodimlar, hokimlik mutasaddilari hamda talabalar ishtirok etishdi.
Uchrashuvni universitet rektori kirish so'zi bilan ochib berdi. Tuman hokimi so'zga chiqib, Qorako'lda amalga oshirilayotgan islohotlar va yangilanishlar haqida gapirdi. Shu bilan birga, yoshlarga yaratilayotgan imkoniyatlar to'g'risida batafsil to'xtalib, talaba-yoshlarga texnologiyalar hamda chet tillarini mukammal o'rganishlari kerakligini ta'kidladi.
Uchrashuv davomida talabalar o'zlarini qiziqtirgan savollarga javob hamda manzilli yechim olishdi.
Jumladan, “O'z soham bo'yicha ishlash imkoniyatlari tumanda qay darajada mavjud?”- deydi qishloq xo'jalik mahsulotlarini qayta ishlash ta'lim yo'nalishi bitiruvchisi G'ofurjonova Zulayho. Tuman hokimi esa Qorako'lda qayta ishlanadigan qishloq xo'jalik mahsulotlari ko'pligini hamda ushbu soha bo'yicha tumanni yanada rivojlantirish lozimligini e'tirof etib, Buxoro davlat universitetining mazkur sohadagi bitiruvchilarini rivojlangan mamlakatlarga hokimlik hisobidan malaka oshirishga yuborib, Qorako'lda qishloq xo'jalik mahsulotlarini qayta ishlashni takomillashtirishni aytdi.
Ochiq muloqot mobaynida tuman bandlik, xalq ta'limi hamda yoshlar bilan ishlash bo'limlari boshliqlari tomonidan barcha murojaatlar o'rganilib, yechimlar topildi. Universitetda tashkil etilayotgan shu kabi uchrashuvlar talaba-yoshlarning ish bilan ta’minlanishiga hamda tumanlardagi iqtisodiy-ijtimoiy rivojlanishning oshishiga ijobiy hissa qo’shmoqda.
