So‘nggi yillarda mamlakatimizda sport sohasiga bo‘lgan e’tibor misli ko‘rilmagan darajada oshdi. Bu esa nafaqat professional sportchilarning yutuqlarida, balki yoshlar orasida sog‘lom turmush tarzining keng ommalashuvida ham yaqqol sezilmoqda. Har bir hududda zamonaviy sport majmualari va stadionlar barpo etilishi, bolalar va o‘smirlar sport maktablari faoliyati yanada rivojlantirilishi, sportchilarimiz Osiyo va jahon miqyosidagi musobaqalarda yurtimiz bayrog‘ini yuksaklarga ko‘tarayotganligi quvonarli hol, albatta.
Respublikamizda har yili an’anaviy tarzda o’tkazilib kelinayotgan oliy ta’lim muassasalari talabalari o’rtasidagi “Universiada” sport musobaqalarining joriy yildagi natijalari Buxoro davlat universitetida boshqa sohalar qatorida sportning ham qanchalar rivojlanayotganligini namoyish etdi. BuxDU talabalari "Universiada 2025" sport musobaqalarida 15 ta sport turi bo'yicha Respublika final bosqichi yakuniy natijasida faxrli 2 - o'rinni egalladi.
Jumladan, voleybol (o’g’il bolalar o’rtasida), dzyudo, shashka sport turlari bo’yicha o’tkazilgan musobaqalarda universitet sportchi talabalari faxrli 1-o’rinni egallashdi. Shuningdek, sportning basketbol (o’g’il bolalar o’rtasida), Yunon-Rum kurashi, erkin kurash turlari bo’yicha bo’lib o’tgan bahslarda BuxDU talabalari faxrli 2-o’ringa munosib ko’rildi. Voleybol (qiz bolalar o’rtasida) hamda stol tennisi bo’yicha musobaqalarda Buxoro davlat universiteti talaba-yoshlari faxrli 3-o’ringa erishishdi.
Buxoro davlat universiteti talabalarining "Universiada 2025" sport musobaqalaridagi mazkur g’alabasi yurtimizdagi, qolaversa, universitetdagi islohotlarning amaliy natijasidir.
