2025-yil 28–29 may kunlari Andijon davlat universitetida “O‘zbekiston – Ozarbayjon: oliy ta’lim sohasida hamkorlikni rivojlantirishning ustuvor yo‘nalishlari” mavzusidagi oliy ta’lim muassasalari rektorlari I forumi bo‘lib o‘tdi. Ushbu forum O‘zbekiston Respublikasi Oliy ta’lim, fan va innovatsiyalar vazirligi hamda Ozarbayjon Respublikasi Fan va ta’lim vazirligi hamkorligida tashkil etildi.
Forumning ilk kunida bo‘lib o‘tgan yalpi majlisda ikki davlat oliy ta’lim tizimlari o‘rtasidagi hamkorlik istiqbollari muhokama qilindi. Jumladan, akademik almashinuv, qo‘shma ta’lim dasturlari, ilmiy-tadqiqot loyihalari va innovatsion tashabbuslar haqida ma’ruzalar tinglandi, ilg‘or tajribalar almashildi.
Tadbirda O‘zbekiston Oliy ta’lim, fan va innovatsiyalar vazirining birinchi o‘rinbosari Shohrux Daliyev, Ozarbayjon Fan va ta’lim vaziri o‘rinbosari Idris Isayev, shuningdek, ikki davlatning nufuzli oliy ta’lim muassasalari rahbarlari ishtirok etdilar. Forum doirasidagi ikki tomonlama uchrashuvlar davomida amaliy hamkorlikni yanada chuqurlashtirish, ta’lim sifatini oshirish va qo‘shma tashabbuslarni amalga oshirish masalalari muhokama qilindi.
Muzokaralar natijasida 60 ga yaqin anglashuv memorandumi, hamkorlik bitimi va yo‘l xaritalari imzolandi. Bu hujjatlar ta’lim va ilm-fan sohasidagi strategik sheriklikni mustahkamlashda muhim qadam bo‘ldi.
Forum doirasida Buxoro davlat universiteti delegatsiyasi ham faol ishtirok etdi. BuxDU rektori, iqtisodiyot fanlari doktori, professor Obidjon Xamidov boshchiligidagi delegatsiya Ozarbayjonning bir qator nufuzli OTMlari bilan o‘zaro manfaatli hamkorlik memorandumlarini imzolashga erishdi. Xususan:
Baku oliy neft maktabi bilan xalqaro akademik mobillik dasturi asosida talabalar va professor-o‘qituvchilar almashinuvi, ilmiy-tadqiqot loyihalari yo‘lga qo‘yilishi rejalashtirilmoqda.
Ozarbayjon davlat iqtisodiyot universiteti (UNEC) bilan imzolangan memorandum ikki oliygoh o‘rtasidagi ta’lim va ilmiy sohalarda hamkorlikni mustahkamlaydi. 1930-yilda tashkil etilgan UNEC bugungi kunda 18 mingga yaqin talaba tahsil olayotgan, xalqaro reytinglarda tan olingan universitet hisoblanadi.
Lankaran davlat universiteti bilan tuzilgan kelishuv ham ikki tomonlama o‘zaro aloqalarni chuqurlashtirishga xizmat qiladi. Lankaran universiteti 1992-yilda mustaqil maqomga ega bo‘lgan bo‘lib, bugungi kunda 1500 dan ortiq talaba tahsil olmoqda.
Ozarbayjon davlat Madaniyat va san’at universiteti (ASUCA) bilan imzolangan memorandum esa san’at, madaniyat va ijodiy yo‘nalishlarda hamkorlikni kengaytirishga yo‘naltirilgan. ASUCA 1923-yilda tashkil topgan bo‘lib, Ozarbayjondagi eng yirik san’at oliygohlaridan biri hisoblanadi.
Forumning ikkinchi kuni BuxDUning Turizm va mehmonxona xo‘jaligi yo‘nalishi o‘qituvchisi Istam Davronov ishtirokida Buxoro viloyatining, xususan Kogon va Romitan tumanlarining turizm salohiyati keng targ‘ib qilindi. Prezidentning 2023-yil 26-apreldagi PQ-135-sonli qarorida belgilangan vazifalar doirasida Buxorodagi ziyoratgohlar, tarixiy obidalar, jumladan Bahouddin Naqshband yodgorligi hamda yangi turistik obyektlar haqida forum ishtirokchilariga atroflicha ma’lumot berildi.
Shuningdek, forum dasturiga muvofiq, O‘zbekiston va Ozarbayjon delegatsiyasi vakillari “Yashil makon” loyihasi doirasida do‘stlik ramzi sifatida daraxt ko‘chatlarini ekish marosimida ham qatnashdilar.
Mazkur forum O‘zbekiston va Ozarbayjon o‘rtasidagi oliy ta’lim aloqalarini sifat jihatidan yangi bosqichga olib chiqdi. Buxoro davlat universitetining faol ishtiroki esa uning xalqaro miqyosdagi nufuzini oshirishga xizmat qilmoqda.
