Hurmatli hamkasblar, aziz kutubxonachilar! Sizlarni yurtimizda keng nishonlanayotgan 21-may — Kutubxonachilar kuni munosabati bilan chin qalbimdan muborakbod etaman!
Bugungi kunda jahon miqyosida bilim va axborot uchun kurash avj olgan bir paytda, kitob va kutubxonalarning qadri, ma’naviy qiymati yanada yuksalib bormoqda. Kutubxona — bu faqat kitob saqlanadigan joy emas, balki aql va tafakkur quvvati oshadigan, kelajak avlodga nur ulashadigan ma’naviyat maskanidir. Ushbu muqaddas maskanda fidokorona mehnat qilayotgan siz, aziz kutubxonachilar esa uning qalbi va ruhidirsiz.
Inson hayotidagi buyuk o‘zgarishlar, fikrdagi yuksalishlar ko‘pincha kitob bilan boshlanadi. Kitob har bir shaxsning hayotini, tafakkurini, dunyoqarashini, kelajagini belgilab beradi. Mana shu ma’naviy boylik manbai — kitoblar olamini kishilarga yetib borishida, ularni to‘g‘ri tanlash, to‘g‘ri yo‘llanma berishda sizlarning xizmatlaringiz beqiyos.
Kutubxonachi — bu faqat kitobni joyiga qo‘yuvchi yoki axborot izlovchi mutaxassis emas. U — ma’naviyat targ‘ibotchisi, ilm-ma’rifat yetakchisi, kitobga mehr bag‘ishlovchi, bilim tarqatuvchi haqiqiy ziyoli inson hisoblanadi. Sizlar har kuni minglab sahifalarni yurakdan o‘tkazib, uning mazmunini o‘quvchiga yetkazish yo‘lida haqiqiy fidoiylik namunasini namoyon etyapsiz.
Hurmatli kutubxonachilar! Sizlarni yana bir bor ushbu qutlug‘ sana bilan muborakbod etar ekanman, kasbiy faoliyatingizda ulkan muvaffaqiyatlar, sog‘lik-salomatlik va farovonlik tilayman.
Hurmat bilan,
O.X.Xamidov — Buxoro davlat universiteti rektori
