Birlashgan millatlar tashkiloti Bosh kotibining yoshlar masalalari bo‘yicha yordamchisi Dr. Felipe Paullier hamda O'zbekiston Respublikasi Yoshlar ishlari agentligi direktori Alisher Sa'dullayev Buxoro davlat universitetiga tashrif buyurib, unda yaratilgan sharoitlar, bo'lib o'tayotgan jarayonlar bilan yaqindan tanishdi.
Universitet rektori Obidjon Xamidov boshchiligidagi universitet rahbariyati mehmonlarni iliq kutib olishdi hamda universitet bosh foyesida tashkil etilgan “Ochiq eshiklar kuni-2025” ko'rgazmalari bilan batafsil tanishib chiqishdi. Dr. Felipe Paullier ko'rgazma bo'yicha o'zini qiziqtirgan savollarga soha mutaxassislari javoblarini oldi.
Shuningdek, tashrif davomida mehmonlar Ofis registrator faoliyati bilan tanishishdi. Universitetda bo'lib o'tayotgan “Yangi O‘zbekiston shukuhidagi ixtisoslashgan maqom maktablarida o‘qitishning zamonaviy uslublari” mavzusida Respublika ilmiy-amaliy konferensiyasida ishtirok etib, o'z fikr-mulohazalarini bildirishdi.
Tashrif davomida Buxoro davlat universiteti Axborot-resurs markazi faoliyati bilan tanishib, iliq fikrlar bildirishdi. Shu bilan birga, Buxoro davlat universiteti muzeyida bo'lib, tilaklar daftarida o'z fikrlarini bildirdi.
Tashrif davomida BuxDU kichik majlislar zalida Birlashgan millatlar tashkiloti Bosh kotibining yoshlar masalalari bo‘yicha yordamchisi Dr. Felipe Paullier hamda O'zbekiston Respublikasi Yoshlar ishlari agentligi direktori Alisher Sa'dullayevlarning universitet talaba-yoshlari bilan uchrashuvi bo'lib o'tdi.
Uchrashuv ochiq muloqot shaklida tashkil etilib, yoshlar o'zlarini qiziqtirgan savollarga javob olishdi. Jumladan, talabalar bugungi kundagi yoshlar harakatlari, media sohasidagi o'zgarishlar, yosh izlanuvchilarni ilhomlantirish usullari haqidagi fikrlar bilan qiziqishdi. Savollarga javob berish jarayonida Dr. Felipe Paullier hamda Alisher Sa'dullayev xalqaro miqyosida yoshlar uchun yaratilayotgan imkoniyatlar, amalga oshirilayotgan loyihalar, yosh tadqiqotchilarni qo'llab-quvvatlash yo'nalishlari haqida to'xtalib o'tishdi.
Uchrashuv so'ngida BuxDU rektori tomonidan mehmonlarga esdalik sovg'alari topshirildi hamda tashrif uchun universitet jamoasi nomidan minnatdorchilik bildirildi.
